Atrás

La Reciella de la Factoría vuelve con tres propuestes online hasta avientu

La Reciella de la Factoría vuelve con tres propuestes online hasta avientu

Publicado el 28 de Octubre de 2020
La primera, esti vienres 30 d'ochobre, a partir de les 19.00 hores

Teatru familiar, con "Les madreñes vacíes" y "El viaxe de Covaletti", y cuentacuentos con "Cachivaches". Va poder vese na páxina web de la Estaya de la Llingua www.llinguaviles.com, en www.aviles.es, les redes sociales del Conceyu d'Avilés y la plataforma Playpresta

"Les madreñes vacíes", de Carlos Alba "Les madreñes vacíes", de Carlos Alba

La Estaya de la Llingua de la conceyalía de Cultura d'Avilés entama otra vegada más el ciclu d'actividaes n'asturianu pa neños y neñes La Reciella de la Factoría. Vuelve con tres propuestes escéniques online, la primera, pasáu mañana, vienres 30 d'ochobre, cola obra de teatru familiar "Les madreñes vacíes", de Carlos Alba, a les 19.00 hores.

La decisión d'ufriles sólo de forma telemática tomóse por culpa de les normes de seguranza y proteición sanitaria escontra'l COVID-19, qu'amenorguen l'aforu del Espaciu Escénicu de la Factoría hasta dexalu sólo en 20 persones.

Esbilláronse tres espectáculos del mundu artísticu asturianu de renome, que yá tuvieron otres veces nel ciclu la Reciella, y que nesti casu ye la primer vez que graben les sos actuaciones nel mesmu espaciu escénicu de la Factoría. El públicu va poder disfrutar de les sos actuaciones dende cualesquier dispositivu electrónicu, como yá se fizo con ésitu nel confinamientu coles actividaes de la Reciella en Casa.

Carlos Alba guiará a lo piquiñino de la casa nun viaxe llargu per oriente, col so espectáculu teatral y de marionetes, "Les madreñes vacíes". Programáu pal marzu pasáu, y que tevo d'aplazase al declarase l'estáu d'alarma. A la fin, va ser pasáu mañana, vienres 30 d'ochobre, a les 19.00 hores.

La cuentacuentos Ana Morán garrará'l relevu'l vienres 20 de payares, y va llevar hasta les cases los sos "Cachivaches", colos que va facer esnalar el maxín, tamién dende les 19.00 hores.

Y tamién un percorríu per diferentes países y cultures ye lo que propón la compañía Higiénico Papel Teatro con "El viaxe de Covaletti", el vienres 11 d'avientu a les 19.00 hores. Un espectáculu que tamién tuvo de suspendese'l pasáu 3 d'abril.

Toes estes actividaes familiares podrán siguise al traviés de la páxina web de la Estaya de la Llingua d'Avilés, www.llinguaviles.com; la del Conceyu, www.aviles.es, asina como nes redes sociales municipales, y na plataforma asturiana de streaming  Playpresta, www.playpresta.com.

Programa

  • 30 d'ochobre, 19.00 hores. "Les madreñes vacíes", de Carlos Alba. Teatru familiar.
  • 20 de payares, 19.00 hores. "Cachivaches", d'Ana Morán. Cuentacuentos.
  • 11 d'avientu, 19.00 hores. "El viaxe de Covaletti", d'Higiénico Papel. Teatru familiar.

 

Imprimir

Eventos destacados