Atrás

La Estaya avera la cultura tradicional asturiana a la infancia col ciclu d'actividaes "Pa que nun t'aburras"

La Estaya avera la cultura tradicional asturiana a la infancia col ciclu d'actividaes "Pa que nun t'aburras"

Publicado el 15 de Febrero de 2021
Cuatro propuestes online, hasta mayu

Entama mañana, martes d'Antroxu, col taller "Pon la mázcara", na que se convida a neños y neñes a facer una careta del ser mitolóxicu que más-yos preste. Podrán siguise nes redes sociales del Conceyu; na web de la Estaya de la Llingua, www.linguaviles.com; la revista dixital de la Fundación Municipal de Cultura, www.avilescultura.com, y la plataforma dixital PlayPresta

Nel taller "Pon la mázcara" se convida a neños y neñes a facer una careta del ser mitolóxicu que más-yos preste Nel taller "Pon la mázcara" se convida a neños y neñes a facer una careta del ser mitolóxicu que más-yos preste

La Estaya de la Llingua d'Avilés afita la so xuntura cola reciella, a la que va averar otra vegada más a la cultura tradicional asturiana d'una forma prestosa y didáutica gracies al ciclu d'actividaes "Pa que nun t'aburras", cuatro talleres infantiles que se van desarrollar de forma telemática. El primeru va ser mañana, 16 de febreru, martes d'Antroxu, con "Pon la mázcara", a les 11:00 hores.

Entamaos pola iniciativa cultural ALADANZA, pa neños y neñes de 5 a 10 años, van terminar en mayu, faciendo ún al mes, coincidiendo en sábadu y a les 11:00 hores; sólo'l de mañana que tien una temática especial antroxera, coincidirá en martes, por ser martes d'Antroxu y festivu pa la comunidá escolar. Tolos talleres van durar media hora.

Podrán siguise peles redes sociales del Conceyu d'Avilés, na páxina web de la Estaya de la Llingua, www.llinguaviles.com; la revista dixital de la Fundación Municipal de Cultura, www.avilescultura.com, y la plataforma dixital asturiana PlayPresta.

La primer propuesta, "Pon la mázacara", mañana martes d'Antroxu, calará a neños y neñes nuna de les folixes de más raigón na tradición asturiana, y va conectala colos seres más fantásticos del folclore, faciendo caretes del personaxe mitolóxicu que más-yos preste, que podrán recortar, pintar y decorar.

Les demás feches son les que vienen darréu:

- Sábadu 27 de marzu. Enteteyando

Con esti taller, neños y neñes van averase d'una forma prestosa a les construcciones populares y a rellacionase colos oficios tradicionales. Convertiránse en teyeros y teyeres, decorando la so propia teya.  

- Sábadu 30 d'abril. Sones y Percusiones

Los instrumentos de percusión, panderetes o castañueles, pero tamién otros tan normales como los preseos de la cocina, son elementos clave na tradición musical asturiana. Al conocelos, neños y neñes entenderán tamién el papel fundamental de la muyer na tresmisión d'esti patrimoniu oral y inmaterial.

- Sábadu 29 de mayu. El baille embruxáu

Una neña que quier sabelo too, un ser mitolóxicu, un conxuru y unos cuantos animales que baillen van xuntase colo más piquiñino de la casa nesti taller, nel que van tomar contautu con bailles y canciones asturianes, asina como cola bayura de vocabulariu rellacionáu col tema.

ALADANZA

La iniciativa cultural ALADANZA ye frutu del saber profesional, formativu y vital de Rosa Cuervo, educadora infantil formada en diferentes metodoloxíes educatives y artístiques. Dende 1990 dedícase a recoyer, enseñar y esparder la cultura tradicional asturiana, n'especial nos ámbitos de la música y el baille, lo que-y sirvió p'algamar, amás d'una esperiencia grande, una visión abierta y integradora del folclore, nel que l'asturianu ye la llingua de comunicación y rellación.

Imprimir

Próximos eventos