Palaciu de Balsera

 
Información

Conservatorio Municipal de Música.

Edificáu al entamu del sieglu XX, ye un palaciu de volúmenes mui bien compensaos, con munchos adornos y coronáu con una torre historicista mui vistosa. El Conceyu comprólu na década de los ochenta pa que fuere sede del Conservatoriu onde se dan enseñances de grau profesional: instrumentos básicos d'orquesta. Tamién se da clase de pianu, guitarra y percusión.

El palaciu de Balsera ye un exemplu de construcción col que la burguesía avilesina qu'espoxiga y medra, mui culturizada estéticamente, llevantaba edificios deslumbrantes nunos casos y na mayor parte de les veces siguiendo la moda del momentu en construcción, y n'otros usando estilos arquiteutónicos históricos. Agora yá nun se conserven los estupendísimos xardinos versallescos que complementaben la mansión, qu'ocupaben tola oriella derecha de la cai Julia de la Riva.  


El palaciu yera la casa onde vivía Victoriano Fernández Balsera, que tenía munchu dineru, sobre too polos beneficios que tuvo España al nun participar na Primer Guerra Mundial. Fernández Balsera yera'l dueñu d'una empresa de productos coloniales y tovía se pueden ver al empezar la carrera que va pa San Xuan, les sos imponentes naves industriales.

Ye un edificiu mui vistosu. Restauróse hai poco. Podemos ver nél los adornos que resalten muncho. Dientro llama l'atención la escalera tan elgante qu'hai. Ábrese en forma d'uve hasta'l primer pisu, asina como la bóveda de cristal emplomáu. Les terraces del últimu pisu y el mirador de la torre son un sitiu preciosu pa ver tola zona histórica y tan guapa na que ta esti edificiu.

 


Últimas noticias