Proyeutos Llocales d'Inclusión Social

Información

Son proyeutos pa persones que tán en situación o riesgu de refugu social,  en collaboración con entidaes sociales del territoriu que complementen la intervención individual y familiar fecha por trabayadores sociales, educadores y téuniques d'acompañamientu llaboral de los equipos de los Centros de Servicios Sociales. 

Proyeutos más importantes 

  •    Proyeutos d'acompañamientu y formación de muyeres en situación o riesgu de refugu social dedicaos a la integración personal, social y llaboral. 
•    Proyeutos formativo-ocupacionales qu'afayen la incorporación social y llaboral de persones con problemes pa  entrar nel mercáu llaboral y en situación de riesgu o refugu social.
•    Proyeutos d'orientación y apoyu a la entrada nel mundu sociollaboral de persones foriates.
•    Proyeutos d'integración de la diversidá y acompañamientu inclusivu con talleres de ciudadanía pa persones xitanes y persones foriates.
•    Proyeutos de agospiu pa munchu tiempu o pa menos  y d'acompañamientu social pa persones ensin casa.
Proyeutos Llocales d'Inclusión Social (PLIS). Añu 2020
1. "Rede pa sofitar  a muyeres en situación o riesgu de refugu social". (Asociación de muyeres La Trébede).
La so finalidá ye promocionar una rede que sofita a les  muyeres que participen nel programa, pa cubrir les sos necesidaes, individuales y coleutives, con grupos d'apoyu, talleres y espacios de sicoterapia, qu'intenta afayar estratexes personales pal cambiu. 

 

2. Cáritas llaboral (Cáritas Diocesana d'Uviéu)
Lo que se pretende ye procurar trabayu a persones en situación de riesgu o de refugu social con munchos problemes pa metese nel mercáu llaboral. Entamen itinerarios personalizaos pa entrar nesi mercáu llaboral que contienen: acoyida y orientación sociollaboral, acompañamientu nesti itinerariu, talleres de formación (Taller Horizonte, Bioescuela), entemediación llaboral y futuru empresarial. 

 

3. Cursu de mantenimientu de zones verdes y xardinos pa personas con problemas de Salud Mental (AFESA)
L'oxetivu ye puxar porque les persones con problemes de salú mental entren nel mundu llaboral y na sociedá, alicando y siendo quien a desenvolver actividaes básiques coles que poder integrase na comunidá y mantenese nel so entornu social, llaboral y familiar. Pa ello entamen una riestra talleres de rehabilitación llaboral y de formación prellaboral. 

 

4. Escuela de Selvicultura Preventiva” (Fundación Secretariáu Xitanu)

Tien l'oxetivu de dar una formación integral pa garrar competencies profesionales, conocimientos y arte pa facer trabayos rellacionaos col mediu ambiente de manera que les persones puedan tener un trabayu rellacionáu coles viesques o los xardinos. Too esto, siguiendo un itinerariu sociollaboral personalizáu qu'afaye la entrada al mundu social y llaboral de les persones participantes.  

 

5. Proyeutu “Taller de formación básica y ciudadanía activa” (Cruz Roxa d'Avilés)

Trabáyense  oxetivos modulares dependientes unos d'otros, qu'afecten tanto a procesos de formación reglada como al arte que se tenga pa poder conseguir capitales sociales y rellacionales: téuniques de llectura y escritura, cálculu, espresión oral y discusión de grupu; fomentu del deprendimientu d'español pa persones foriates.  
Inclúyense módulos tresversales referentes, nun sentidu ampliu, a la igualdá d'oportunidaes (por exemplu, de xéneru o ente cultures), entamando coles nueves teunoloxíes, la educación vial o'l mediu ambiente. 
 

¿Pa Quién Ye? 

Pa coleutivos de persones que tán  en situación o riesgu de refugu social.


Últimas noticias