Conoz Avilés
250 establecimientos xúnense a la campaña de dinamización comercial del Conceyu y la Mesa de Comerciu d'Avilés
24 oct. 2022
Habrá una yincana comercial pa que la xente compre nel comerciu pequeñu y na que se van rifar tres vales de 100 euros, y una ludoteca pa les families. Desenvolveráse los díes 28 y 29 d'ochobre y el 25 y el 26 de payares.

 


 

La campaña cuenta con un logu propiu, n'alcordanza de la simbólica FOCA d'Avilés, acrónimu nesti casu de Fortaleza, Orgullu, Comerciu y Avilés. Ye un distintivu que va poner cada comerciu que tea dientro la campaña nun sitiu del so comerciu que se vea bien, y qu-y lu tien qu'apurrir la so Asociación de referencia.

Serviciu de ludoteca "Manos de Colores"

Ye un espaciu acutáu y iguáu na pista La Exposición, pa que neños y neñes d'ente 4 y 12 años lo pasen bien y tamién pa que les families puedan dir mercar a los comercios de la ciudá, dexando a los rapacinos y rapacines ellí dos hores.

Pa ello habrá un recintu atendíu por monitores de tiempu llibre, que van organizar, por edaes, talleres y xuegos prestosos. Cuando los y les vayan buscar tendrán que presentar un vale, que va haber en tolos comercios participantes. en concretu aquel nel que se comprare. 

Tará disponible nos dos períodos en que se divide la campaña, los vienres, n'horariu de 17.00 a 20.00 hores, y los sábados, de 10.00 a 14.00 hores y de 17.00 a 20.00 hores.

Yincana Comercial con tres vales de 100 euros de premiu

Una actividá pensada tamién pa les families, que tendrá qu'atopar una ayalga escondía nos escaparates de los comercios participantes. Na edición d'ochobre podrá xugase dende'l miércoles 26 d'ochobre hasta'l xueves 3 de paayres, pudiendo asina aprovechar la ponte nes escueles, pa que rapacinos y rapacines lo pasen bien mercando en familia n'Avilés. La de payares sedrá los díes nomaos enantes, vienres 25 y sábadu 26. 

Les families que quieran participar podrán recoyer el so pasaporte na Oficina de Turismu dende'l llunes 24 d'ochobre o tamién lu van poder descargar de la web de Conceyu d'Avilés (aviles.es). Nesti documentu van tener tolo que necesiten pa entamar a xugar y mercar pela ciudá d'una forma prestosa. .

Tendrán qu'atopar, ente los 30 escaparates esbillaos por sortéu pa esta edición, una foca de Halloween escondía nos escaparates, pa dempués sellar el pasaporte nesos comercios. P'atopar estes foques, tendrán un mapa y una riestra pistes interpretatives. 

Les families que pasen toles pruebes y faigan 2 compres polo menos en dalgún de los comercios participantes, dexarán el so pasaporte cubiertu nuna urna afayada pa ello na Oficina de Turismu y participarán nun sortéu onde se van poder beneficiar de los premios que dan les Asociaciones organizadores: tres vales de 100 euros caún pa gastar nos comercios d'Avilés.

*Mesa de Comercio d'Avilés

Componen la Mesa de Comerciu, amás de la conceyalía, representantes de les entidaes comerciales UCAYC, la Cámara Comercio, ACEA y l'Asociación de Comerciantes del Carbayedo. Para sumase a la campaña, estableciéronse estos requisitos:

  • Ser un comerciu asociáu en dalguna de les entidades que tán na mesa del comerciu d'Avilés
  • Colocar un distintivu que la xente que vaya pela cai pueda velu bien y que se va dar a quien collabore esta campaña
  • Compromisu de participar na campaña lo mesmo pa la decoración temática de los escaparates como dando-yos a los y les clientes los vales pa esto. 

 

  • Conoce Avilés

También te puede interesar...