Ayuda
La estaya municipal de Formación y Empléu diseñó siete cursos dientro del sector de la teunoloxía y el metal pa formar a 92 persones que nun tienen trabayu nunos perfiles que pide'l mercáu llaboral, seis d'ellos col compromisu de contratación de, polo menos, 44 persones a cortu y mediu plazu. Les formaciones son: Alministración de Sistemes, Testing, soldadura por Arcu Sumerxíu, Operariu/a de Calderería y ensamblaxe de Torres Eóliques, y Téunicu Supervisor de Soldadura.
Les persones intersaes pueden apuntase colos formularios que tán na www.aviles.es o nos teléfonos 985 51 14 77 - 985 12 91 10 del Dentru d'Empléu Europa.
Los dos cursos del sector teunolóxicu, Alministración de Sistemes y Testing, nos que se van formar un total de 20 persones, tán dientro del conveniu que'l conceyu d'Avilés firmó esti añu con CLUSTER TIC ASTURIAS. Los cinco del sector del metal diseñáronse dientro'l conveniu que'l Conceyu firmó dende 'l 2021 con FEMETAL.
Asina'l Conceyu d'Avilés sigue cola llinia estratéxica de facer convenios de collaboración col texíu empresarial. Esta actuación ye prioritaria, porque se sofita nel análisis estratéxicu de demanda del texíu empresarial de perfiles profesionales pa incorporalos a cortu y mediu plazu. Estos convenios concrétense nel diseñu d'aiciones formatives pa que nun haya vacantes o problemes pa tener determinaos perfiles profesionales que puedan ser un problema p'afitar les empreses na nuestra contorna de determinaos sectores productivos.
Alministración de Sistemes
El so oxetivu ye que l'alumnáu, en terminando la so formación, seya quien a encargase de xestionar les cuentes d'usuarios y usuaries, los permisos, derechos d'accesu y sitios d'almacenamientu d'una organización. Tamién se deprenden coses pa solucionar problemes de hardware y sotware rellacionaos con dispositivos d'almacenamientu, asina como sofitu téunicu. Son cursos de 460 hores y tien un compromisu de contratación del 40% del alumnáu.
Testing
Pretende formar nel usu de téuniques informátiques que dexen investigar sobre la calidá de los productos o servicios con pruebes, asina como l'usu de programes informáticos pa meyorar la calidá d'un productu o serviciu. La so duración ye de 345 hores y tien un compromisu de contratación del 40%.
Soldadura por Arcu Sumerxíu
Ye un procesu con arcu eléctricu onde l'arcu y el bañu de fusión tán tapaos. Ye pa 45 persones con muncha motivación pa trabayar nel sector del metal y con una duración de 245 hores. Habrá tres ediciones. Les dos primeres van empezar en setiembre y la tercera en xineru de 2023. en caúna d'elles habrá 15 participantes. Tien, un compromisu de contratación del 60% por un tiempu mínimu de 6 meses.
Operariu/a de Calderería y Ensamblaxe de Torres Eóliques
Pretende formar na fechura, montaxe y reparación d'elementos de calderería y nel ensamblaxe de torres eóliques. La formación, d'un total de 346 hores, ye pa 15 persones que sepan dalgo de calderería. El cursu tien un compromisu de contatación del 60% de les persones que resulten aptes, según la so valía y enfotu, por un tiempu mínimu de 6 meses.
Téunicu/a Supervisor/a de Soldadura
Ye pa 12 persones que nun tengan trabayu (sobre too d'Avilés) que tengan formación yá nel sector del metal y que lo puedan acreditar con certificaos de profesionalidá, cilcos formativos, y/o esperiencia llaboral en metalmecánica. Dura 686 hores y al terminar podrán tener el certificáu d'inspección de cosntrucciones doldaes y el carné profesional, como Operadores (Nivel I) o Inspectores (Nivel II)
La collaboración públicu-privada ye quien a aprovechar la esperiencia, recursos y capacidaes de toles entidaes implicaes, facer que xurdan bones rellaciones que repercutan en que les condiciones de la ciudá seyan meyores como espaciu económicu y puxar pa que la ciudadanía se convierta nel motor principal d'espoxigue, meyorando la posibilidá de tener un trabayu, les persones d'Avilés que nun lu tienen y respondiendo a les necesidaes reales de les empreses del territoriu.
*Enllaz direutu al formulariu p'apuntase al Cursu d'Operariu/a de Calderería y ensamblaxe de Torres Eóliques:
*Enllaz direutu al formulariu p'apuntase al Cursu de Soldadura por Arcu Sumerxíu:
*Enllaz direutu al formulariu p'apuntase al Cursu de Técnicu/a Supervisor/a de Soldadura:
*Enllaz direutu al formulariu p'apuntase al Cursu d'Alministración de Sistemes:
*Enllaz direutu al formulariu p'apuntase al Cursu de Testing:
- Formación y Empleo