Contacto

El Conceyu d'Avilés yá tien en marcha la segunda convocatoria de 2022 d'ayudes a empreses y autónomos o autónomes pa contratar persones d'Avilés que nun tengan trabayu por un tiempu que nun pue ser de menos de seis meses. El Boletín Oficial del Principáu d'Asturies (BOPA) publicó'l miércoles 7 de setiembre un resume de la convocatoria pola que puxa la conceyalía de Formación y Emplegu. Les solicitúes pueden presentase hasta'l 14 d'ochobre. La cantidá prevista ye de 40.000 euros.  

Les ayudes son pa los gastos de les contrataciones (salariu brutu, cotización a la Seguridá Social a cargu de la empresa y prorrata de pagues estraordinaries) y son d'ente 1.000 a 3.000 euros mensuales, según la categoría profesional) y la xornada llaboral. Los contratos podrán ser de xornada completa o media xornada. 

Pueden subvencionase contrataciones que faigan les empreses, entidaes que nun pretendan sacar provechu y autónomes o autónomos d'Asturies empadronaes nel Conceyu d'Avilés polo menos 12 meses enantes y que nel mes anterior a la fecha d'alta, nun tuvieren trabayu. Les contrataciones tendrán que que facese ente'l 1 d'abil y el 30 de setiembre de 2022, durando como mínimu seis meses y tendrán que suponer un aumentu de la plantiya  de la empresa en comparanza colos cuatro meses anteriores. El nivel de plantiya media tendrá que mantenese polo menos seis meses.

Les solicitúes podrán presentase pela sede electrónica municipal

(https://sedeelectronica.aviles.es/Convocatories) o nel Rexistru Xeneral del Cobnceyu, nos rexistros auxiliares o por cualquiera de los medios previstos nel artículu 16 de la Llei.

39/2015, de 1 d'ochobre, del Procedimientu Alministrativu Común de les Alministraciones Públiques. Conforme al artículu 14 d'esta llei les persones xurídiques tán obligaes a la presentación electrónica de la solicitú.

Documentación

Los solicitantes tendrán d'aportar esta documentación:

· La solicitú tendrá de facese, según modelu normalizáu, identificando'l perfil y la categoría profesional a contratar y detallando'l puestu o puestos de trabayu que s'ufierten.

· Documentu qu'acredite l'actuación del representante llegal.

· Informe de Plantiya Media de Trabayadores d'Alta de la Tesorería Xeneral de la Seguridá Social de los cuatro meses naturales anteriores y el del mes de contratu con tolos códigos de cuenta cotización de la empresa.

· Documentos acreditativos de la inscripción que da la TXSS si la empresa/entidá lleva funcionando menos de tres meses.

· Contratu de trabayu con sellu del Serviciu Públicu d'Empléu o xustificante de la comunicación a la oficina del Serviciu Públicu d'Empléu correspondiente de la contratación, na que pueda vese la buelga electrónica.

· Vida Llaboral de la persona desempleada contratada, actualizada a fecha de presentación de la solicitú.

· Declaración responsable sobre cualquier ayuda recibida incluyida nel réxime de mínimis nos dos exercicios fiscales anteriores y nel exerciciu d'anguaño.

Cuando seya la primer vez que les entidades soliciten una subvención al Conceyu tendrán que presentar, amás:

— Tarxeta d'identificación fiscal.

— Ficha d'Acreedores.

Lo mesmo la consulta nes bases de la convocatoria como la tramitación de les solicitúes pueden facese na Sede Electrónica municipla en este enlace: https://bit.ly/3BBp2i7

Ayudes 2021 y 2022

Na primer convocatoria d'esti añu diéronse ayudes pa 12 contratos (toos de muyeres) que beneficiaron a 11 empreses, les que teníen más puntuación según les bases llantaes (tamañu de la empresa, tipu de contratu y coleutivu al que pertenez cada persona). 

L'añu pasáu hubo un presupuestu de 80.000 euros que se terminaron del too. Fueron 20 empreses a les que-yos dieron ayudes pa  poder pagar los sueldos y tres meses a la Seguridá Social d'incorporación d'una persona nueva a la plantiya. Fueron 24 les persones que nun teníen trabayu y que, polo menos 6 meses, pudieron tar contrataes, col sofitu del Conceyu d'Avilés. D'estes 24 persones, 16 yeren muyeres y 8 homes.