Contacto

Yá ta abiertu'l plazu p'apuntase pa que les asociaciones, los centros educativos, les persones y los grupos concienciaos col mediuambiente faigan llimpieces voluntaries d'espacios naturales. A esta campaña, promovida por COGERSA, xúnese'l Conceyu d'Avilés que va coordinar lo que se va facer nel conceyu al traviés de la Seición de Servicios Urbanos y la Oficina Municipal del Voluntariáu del Serviciu de Participación Ciudadana. 

Les asociaciones, centros educativos o cualquier otru coleutivu o persones interesaes en participar nesta campaña pueden rellenar la so solicitú nel  Formulariu que ta en www.avilesvoluntariado.org que, en rellenándolu, tendrán que mandar a participacion@aviles.es.

Les llimpieces voluntaries consisten en recoyíes manuales de restos que tán tiraos per zones naturales d'usu públicu como resultáu de males práutiques por parte de los usuarios y les usuaries d'eses zones. Nun son residuos peligrosos, son coses como muebles, preseos, botes, plásticos, cartones, vidrios, restos de chatarra, electrodomésticos, neumáticos o restos vexetales, ente otros.

Van ser prioritaries les aiciones de llimpieza que se centren en cachos del camín de Santiago, magar que puedan facese tamién n'otres zones d'Avilés como la sienda'l ríu Arlós-dende'l cachu que ta enterráu en Llaranes hasta la llende del Conceyu-, la sienda'l ríu Madalena- dende la cai El Bosque hasta la Fonte Santos-y la playa de San Balandrán. 

En definitiva, son zones que pueden llimpiase, siendes verdes y caminos n'espacios naturales, merenderos, zones d'ociu, calces y desembocadures de ríos, dunes, partes de les playes onde nun pueden llegar les máquines que les llimpien normalmente, asina como otres zones verdes naturales. Queden fuera d'esta campaña los desbroces y llimieces de cunetes, asina como la descontaminación de vertederos illegales. 

Cartel de la Campaña Llimpieces Voluntaries n'espacios naturales

COGERSA dará-yos a voluntarios y voluntaries el material que necesiten pa llimpiar: sacos, guantes de nitrilu, mochiles que puedan vese bien y gorres pal sol. Si ye muncho lo qu'hai de llimpiar, pondráse un contenedor onde se vaya llimpiar y llevaráse ellí lo que se tenga de tirar. 

Pa más información, cualquier persona interesada podrá contactar cola Oficina Municipal del Voluntariáu - Serviciu de Participación Ciudadana pel teléfonu 985 129 098 o con un corréu electrónicu a: participacion@aviles.es

*Enllaz direutu al Formulariu: https://avilesvoluntariado.org/wp-content/uploads/2022/05/FORMULARIU-INSCRIPCIÓN_CAMPAÑA-LLIMPIECES-VOLUNTARIES-pa-entidaes_2022.pdf