![](/documents/20124/803909/2.14+Palacio+de+Valdecarzana.jpg/47c13c97-7cb2-b1e3-da41-e81737ba9761?t=1631190773088)
Avilés toma'l relevu a Arriondas/Les Arriondes, en Parres, y acoyerá la sesta parada de la 'Xira pola oficialidá' con una programación d'ctividaes dende'l llunes día 2 al vienres 6 de setiembre nel Palaciu de Valdecarzana col envís d'esparder y normalizar la llingua y la cultura asturianes. Nestos cinco díes y de baldre, habrá una esposición, charres y proyeiciones de vidios reivindicativos del usu de la llingua asturiana, con guiños al conceyu avilesín como'l al so Fueru, la so toponimia o la so lliteratura n'asturianu.
La Xira pola Oficialidá ye una movilización cívica qu'organicen al empar Iniciativa pol Asturianu y la Fundación Almastur cola collaboración de los conceyos, nesti casu del Conceyu d'Avilés per aciu de la Estaya de la Llingua.
Iniciativa pol asturianu y Almastur firmaron en febreru de 2023 un conveniu de collaboración pa trabayar n'ensame n'actividaes rellacionaes cola llingua y la cultura asturianes. Ye una actividá de pasu que pretende percorrer los 78 conceyos asturianos y otros sitios d'España pa involucrar a tola ciudadanía y a les organizaciones con sensibilidá llingüística pa defender el derechu a la oficialidá. La Xira yá fizo parada en Bimenes, Samartín del Rei Aurelio, Mieres y Parres.
N'Avilés toles actividaes sedrán de 19:00 a 20:30 hores y entma la programación el llunes día 2 nel Palaciu de Valdecarzana cola inauguración oficial de la esposición "Voces: una historia de la llingua asturiana". Contaráse cola collaboración de l'asociación avilesina "Xaréu d'Ochobre" qu'interpretará a la gaita y al tambor dalgunes pieces.
El martes 3 el gran protagonista sedrá'l Fueru d'Avilés y l'usu oficial del asturianu na Edá Media, nuna charra na que se contará cola participación del profesor de la Universidá d'Uviéu Xulio Viejo Fernández.
El miércoles 4 el tema sedrá la oficialidá del asturianu y el xueves 5 la toponimia d'Avilés, quedando pal vienres 6 un recital poéticu cola llectura de poemes n'asturianu y la presencia de poetes avilesines.
Programa Avilés VI parada 'Xira pola Oficialidá'
Llunes 2
- Inauguración oficial de la esposición 'Voces: una historia de la llingua asturiana', cola colaboración de l'asociación avilesina Xaréu d'Ochobre, qu'interpretará a la gaita y al tambor dalgunes pieces musicales.
- Proyeición del vidiu 'De güeles a nietes. Tresmisión xeneracional del asturianu'.
Martes 3
- Charra 'El Fueru d'Avilés y l'usu oficial del asturianu na Edá Media'. Cola participación del profesor de la Universidá d'Uviéu, Xulio Viejo Fernández
Miércoles 4
- Proyeición del documental 'La vida ensin oficialidá'
- Charra: ¿Por qué sí a la Oficilidá?, pol académicu Inaciu Galán y González
Xueves 5
- Charra 'Toponimia d'Avilés: ¿Qué nos dicen los nomes de los nuestros pueblos?'. Cola participación del profesor de la Universidá d'Uviéu y académicu, Ramón d'Andrés Díaz.
Vienres 6
- Proyeición del documental 'Avilés tien poesía'. Cola participación de poetes avilesines.
- Recital poéticu. Llectura de poemes a cargu del académicu de la llingua asturiana, Carlos Rubiera Tuya
Hora: 19:00 a 20:30 hores
Palaciu de Valdecarzana
La entrada ye llibre hasta completar aforu.
- Tu Ayuntamiento
- Normalización Llingüística