Contacto

CaleyAvilés convirtióse nuna referencia pa disfrutar de la ciudá y conocela más a fondu n'asturianu. El ciclu de visites guiaes organizáu pola Estaya de la Llingua cumple 10 años con un ésitu de participación y como yá ta mui afitáu va aumentase'l númberu de places, de 15 pasa a 25 pa cada visita. 

Pero'l platu fuerte d'esta celebración d'aniversariu, vien con una propuesta nueva, amás de los percorríos más de siempre: el 12 de xunetu habrá una visita teatralizada cola escritora avilesina Matilde Soignie, que repasará los sitios nos que vivió y pelos qu'anduvo na ciudá.

Matilde de Soignie ye la segunda autora qu'escribe n'asturianu que publicó un llibru, dempués d'Enriqueta González Rubín. La obra titúlase Ecos de mi aldea y descubrióse en 2021. El día 12 de xunetu, a les 19:00 hores, les persones apuntaes alcontraránse na plaza d'El Carbayo, frente a la ilesia vieya de Sabugo, pa conocer más fonderamente a esta autora.

Les demás visites van ser a les 19:00 hores y guiaes pol guía oficial del Principáu d'Asturies Denis Soria. Pa toes elles, incluyida la visita teatralizada con Matilde de Soignie, hai d'apuntase primero llamando al 985 545 508, mandando un corréu electrónic a estayallingua@aviles.es o un Whatsapp al númberu 634 821 613. Ufiértense un total de 25 places de baldre pa cada turnu.

El día 21 de xunu l'actividá entamará con un paséu guiáu pela ría d'Avilés y el Centru Niemeyer. El puntu d'alcuentru va ser la plaza d'El Carbayo, delantre la ilesia vieya de Sabugo.

El 26 de xunetu, sedrá'l momentu de descubrir el parque Ferrera, con una parada detallada nel edificiu de La Noria, que tamién sedrá'l puntu d'alcuentru pa entamar la visita.

Más p'alantre, el 23 d'agostu, ofreceráse una visita guiada al palaciu de Valdecarzana, sede del Archivu Históricu de la ciudá. Esti percorríu ye'l resultáu de la propuesta del cursu de 6^u de primaria del CEIP Marcelo Gago. El puntu d'alcuentru nesta ocasión sedrá'l mesmu palaciu de Valdecarzana.

Pa terminar, el 6 de setiembre sedrá'l momentu de descubrir el barriu de Llaranes, con una visita a la so emblemática ilesia de Santa Bárbara. Pa ello, los y les participantes van alcontrase col guía na Plaza Mayor de Llaranes.

Los y les menores que participen nes visites tendrán que dir acompañaes d'una persona adulta. Per otru llau, recomiéndase llevar calzáu cómodo.

Calendariu de visites

• Vienres 21 de xunu.  Paséu pela Ría y Centru Niemeyer
• Vienres 12 de xunetu. Visita teatralizada con Matilde Soignie
• Vienres 26 de xunetu. Parque Ferrera
• Vienres 23 d'agostu. Palaciu de Valdecarzana
• Vienres 6 de setiembre. Barriu de Llaranes