Miguel Solís Santos y Ana Solís
El Palaciu de Valdecarzana acoyerá una esposición sobre'l so cómic 'La Hestoria d'Avilés' y el 8 de mayu fadráse un actu de reconocimientu al académicu y escritor nel Salón de Receiciones de la Casa Conceyu
El Conceyu d'Avilés va celebrar el 'Día de les Lletres Asturianes 2026' con una riestra actividaes alrodiu de la figura de Miguel Solís Santos (Avilés 1956), biólogu dibuxante y miembru de l'Academia de la Llingua Asturiana, escritor de varies obres en llingua asturiana y autor de la primer novela n'asturianu, 'Les Llamuergues Doraes' (1982).
El programa d'actividaes, presentóse güei pela mañana pola conceyala de Normalización Llingüística, Ana Solís, incluye una esposición que ye un homenaxe a la trayectoria del profesos y académicu avilesín nel 70 aniversariu del so nacimientu. L'amuesa inaugúrase nel Palaciu de Valdecarzana, el xueves 23 d'abril (12:00 hores) y va poder vese ellí hasta'l 8 de mayu, pero ta preparada pa poder llevala per otros barrios de la ciudá.
Esta esposición recueye la obra pictórica orixinal de Miguel Solís Santos de la que xurdió la obra gráfica de 'La Hestoria d'Avilés', un cómic escritu en llingua asturiana nel que se fai un percorríu pela historia d'Avilés, los sos fechos históricos más significativos y los personaxes más nomaos de la Villa, una obra que s'asoleyó en 1985. Amás de pol material gráficu, na esposición podrá facese un percorríu viendo la riestra oxetos personales del autor rellacionaos cola obra. El día de la inauguración, el xueves 23, tará l'autor, Miguel Solís Santos, que va facer una visita guiada pela esposición.
El 8 de mayu, que ye la fecha na que se festexa 'El Día de les Lletres Asturianes', a les 12:00 hores nel Salón de Receiciones del Conceyu d'Avilés, sedrá un actu de homenaxe y reconocimientu a Miguel Solís Santos cola presencia d'autoridaes y personalidaes del mundu asturianista nel que se van lleer dalgunos de los testos del autor.
Miguel Solís Santos ye llicenciáu en Biolóxiques pola Universidá d'Uviéu. Profesor d'Institutu de Bioloxía y Xeoloxía. Autor de 'La Hestoria d´Avilés' (ediciones 1985, 1992 y 2009). Premiáu en 2000 col Fuertes Acevedo pol so ensayu históricu sobre los indianos 'La Memoria de les dos Orielles'.
Miembru correspondiente de l'Academia de la Llingua Asturiana. Escritor bayurosu, ente les sos obres destaca Les Llamuergues Doraes, primer novela moderna escrita n'asturianu (1982). Premiaáu col Xosefa Xovellanos de novela nes convocatories de 1980, 1981, 1984 y 2004. Redactor y ilustrador de varios títulos de lliteratura moza y material pedagóxicu.
Pintor de tendencia cubista y espresionista. Cartelista y dibuxante, autor de planos turísticos de la Conseyería de Turismu y del suplementu ‘Así funciona Asturias’ de La Voz de Asturias (1996, 1997). Articulista y collaborador del periódicu La Nueva España. En 2007 gana'l premiu de periodismu Enriqueta González Rubín.
- Normalización Llingüística