Marisa Luque, Yolanda Alonso, José Federico Á. Palacios y David García

La plaza Hermanos Orbón vuelve a convertise nel Mercáu de Les Aceñes cola XXI edición de la Seronda n'Avilés. Una celebración de seronda, los sos productos y tradiciones más asturianes, enforma xuníos a comer bien y a música allegre y de raigón, protagonistes otru añu más, el fin de selmana que vien, el vienres 25 y el sábadu 26 d'ochobre.

Organizáu pola Federación d'Asociaciones Xuntanza d'Avilés, el Conceyu d'Avilés y la collaboración de La Plaza y Caja Rural de Asturias, presentáronla pela mañana Yolanda Alonso, conceyala de Cultura, y David García, conceyal de Normalización Llingüística, acompañaos por José Federico Álvarez Palacios, presidente de Xuntanza.

Avilés reivindica'l patrimoniu cultural tan bayurosu de la seronda asturiana, memoria y presente. Una carpa va presidir l'espaciu, na qu'un chigre, lleváu pola Asociación Cultural de Piniella, permitirá tastiar bonos productos como la sidra, castañes o tortos.

Tamién habrá un escenariu, onde la música va convertise nel otru gran protagonista del programa d'actividaes, yá dende la inauguración oficial, el vienres a les 19.15 hores (la carpa ábrese a les 19.00 hores) cola actuación de la Bandina Cuatrolán.

El mesmu vienres garrarán el relevu los bailles y soníos más tradicionales gracies al trabayu de Xaréu d'ochobre y Escontra'l raigañu, pa siguir dempués cola Bandina Cuatrolán pa terminar con Marta Elola y Arella, a les 22.00 hores.

Pal otru día, el sábadu 26, entama too al mediudía, al abrir la carpa y el chigre a les 12.00 hores, acompañao too cola música del Área Tradicional de la Escuela Municipal de Música "Beatriz Osorio" de Bembibre (Lleón) , pa siguir colos cantares de "Amigos del chigre", como aperitivu perfeutu hasta llegar al platu fuerte, la xinta popular, col pote de berces y arroz con lleche, a les 14.00 hores.

Pela tarde, acútase un espaciu pa la reciella que va pasalo mui bien cola animación qu'hai y col cuentu "Efectos naturales", a les 17.00 hores. Dempués, l'Área Tradicional de la Escuela Municipal de Música "Beatriz Osorio" de Bembibre actuará enantes de qu'entame la 'Nueche en danza' con 6 Riales (20.30 h.) y el ramu que lu van poner  Pandereteros d'Anguaño (22.00 h.)

Programa XXI Seronda N'Avilés

Vienres 25 d'ochobre

• 19.00 horas. Apertura de la carpa, con música popular d'animación y chigres con productos de seronda: sidra, castañes, tortos... Asociación Cultural de Piniella
• 19.15 hores. Inauguración oficial de la XXI Seronda n'Avilés. Actuación de la Bandina Cuatrolán
• 20.00 hores. Amuesa de bailles y sones tradicionales con Xaréu d'ochobre y Escontra'l Raigañu
• 21.30 hores. Actuación de Bandina Cuatrolán
• 22.00 hores. Conciertu de Marta Elola y Arella

Sábadu 26 d'ochobre

• 12.00 hores. Apertura de la carpa col Área Tradicional de la Escuela Municipal de Música "Beatriz Osorio" de Bembibre (Lleón). Chigre con productos de seronda, de l'Asociación Cultural de Piniella
• 12.30 hores. Cantares de chigre con Amigos del Chigre
• 14.00 hores. Xinta popular: pote de berces y arroz con lleche
• 17.00 hores. Animación infantil. Cuentu "Efectos Naturales"
• 19.00 hores. Bailles y sones tradicionales col Área Tradicional de la Escuela Municipal de Música "Beatriz Osorio" de Bembibre (Lleón)
• 20.30 hores. Nueche en danza. Actuación de 6 Riales
• 21.30 hores. Nueche en danza. Actuación de Pandereteros d'Anguaño