Contacto

La Estaya de La Llingua d'Avilés organiza un ciclu de talleres de manualidaes nos centros culturales de La Carriona, Los Canapés y La Xungarosa/El barrio de La Luz. Col títulu "Pa que nun t'aburras", la educadora infantil de l'Asociación Aladanza, Rosa Cuervo, va dar los talleres a neños y neñes de 4 a 7 años. Esti vienres, de 18:00 a 19:30 hores fadráse'l primer taller en La Carriona, que-yos va prestar muncho recortando, pintando y decorando les sos propies mázcares pal antroxu.

El ciclu desenvuélvese nos meses de febreru, marzu y abril. En cada taller habrá 15 places y los interesaos y les interesaes tendrán qu'apuntase primero. Podrán facelo na biblioteca de cada centru, per WhatsApp nel 634 821 613, llamando al 985 545 508 de 9:00 a 14:00 hores o nel corréu electrónicu estayallingua@aviles.es

Nos primeros tres vienres de febreru, neños y neñes van pasalo mui bien recortando, pintando y decorando nel taller "Faciendo mázcares". El día 3 ye en La Carriona, el 10 en Los Canapés y, l'últimu, va ser el 17 en La Xungarosa/El barrio de La Luz

Marzu y abril sedrán meses de "Cuentos con munchu arte". Nel primeru usaráse la plastilina pa da-yos formes a les ilustraciones de "Fina la parrochina" de Carla Menéndez. El vienres 3 de marzu sedrá'l turnu de Los Canapés; el 10, de La Xungarosa/El barrio de La Luz; y el 17, de La Carriona.

N'abril van pintase y recortase les ilustraciones que darán vida al cuentu "La Curuxa Catuxa" de Vero Suari y Inaciu Galán. El vienres 14 ye en La Carriona, el 21 en La Xungarosa/El barrio de La Luz y el 28 en Los Canapés.

Tolos talleres entamarán a les 18:00 y terminarán a les 19:30 hores y son de baldre.