Culture
La Estaya de la Llingua d'Avilés convoca'l primer "Concursu de Ramos de Navidá na escuela"
22 nov. 2022
El plazu ta abiertu hasta'l 12 d'avientu. Ye pa centros escolares públicos avilesinos que propongan al so alumnáu facer ramos de Navidá, valorándose la so estética y orixinalidá, asina como l'usu d'elementos tradicionales na decoración.

La Estaya de la Llingua d'Avilés convoca la primer edición del Concursu de Ramos de Navidá na escuela. Hasta'l 12 d'avientu va tar abiertu'l plazu pa la presentación de trabayos a esti certamen que ye pa centros escolares públicos avilesinos que quieran proponer al so alumnáu facer un ramu de Navidá, valorándose la so estética y orixinalidá, asina como l'usu d'elementos tradicionales na decoración.

Los centros educativos interesaos van poder algamar un premiu que consiste nun cuentacuentos o taller didáuticu nel propiu centru, nel horariu que s'escueya pa ello, o si nun se pudiere facer esta actividá podría ser un llote de llibros pa la biblioteca escolar.

Pa confirmar la so participación los centros tendrán qu'escribir un corréu electrónicu a la direición estayallingua@aviles.es. Enantes del 12 d'avientu van poder mandar hasta tres retratos del ramu que fixeron nos que se pueda ver, d'una forma mui clara, lo mesmo la so estructura que la so decoración. La forma na qu'hai de mandar los retratos ye per WhatsApp al númberu 634 82 16 13

Los criterios de valoración de los ramos son estos:

  • Decoración: tendrán prioridá los ramos qu'usen elementos tradicionales, asina como los que se faigan con proporcionalidá y armonía.
  • Originalidá: va valorase l'usu d'elementos decorativos novedosos y diferentes, siempre y cuando tean bien mecíos colos tradicionales.
  • Estética: van valorase los ramos de dos triángulos o dos pisos.

El fallu del xuráu asoleyaráse'l  15 d'avientu, comunicándo-ylo al mesmu tiempu al centru ganador.

  • Cultura

También te puede interesar...