Culture
La Reciella de la Factoría recupera la presencialidá con tres propuestes de música y cuentacuentos hasta abril
23 feb. 2022
  • Entama'l vienres 25 de febreru, David Varela col so "Restolando", nel que neñes y neños van averase a los intrumentos tradicionales con canciones prestoses.

  • En marzu llegará Olga Cuervo con "Elles tamién cuenten II", y n'abril sedrá'l turnu d'Ana Morán con "Zapatos".

  • Les actividaes son de baldre, con entrada llibre hasta completar aforu. Neños y neñes tendrán de dir acompañaes por una persona adulta.

La Reciella de la Factoría, el programa de la Estaya de la Llingua d'Avilés gracies al que neñes y neños se calen na conocencia de la cultura y la llingua asturianes, recupera la presencialidá nel so sitiu de siempre, la Sala Escénica de la Factoría Cultural. Y failo con tres propuestes, de música y cuentacuentos, hasta abril. 

L'actividá de la Reciella nun paró, porque se llevó pal mundu virtual, peles redes sociales del Conceyu d'Avilés y la plataforma de vidios n'asturianu PlayPresta. L'encargáu de retomar l'escenariu en direutu, el vienres 25 de fefreru a les 19:00 hores, que yá ye tou un clásicu d'esta programación: el músicu y animador cultural David Varela.

Varela presenta "Restolando", un espectáculu pa tola familia nel que neñes y neños van averase a los intrumentos tradicionales de música asturiana, como panderos, panderetes, carraques, matraques, tarrañueles y munchos más.

Pasalo bien, ta garantizao, colos soníos folixeros y los estribillos pegadizos de les canciones de Varela, qu'engancharán dende'l principiu hasta'l final. 

L'actuación de dempués tráenos otra vez a otra artista bien conocida pol públicu de siempre de la Reciella, lo mesmo presencial que dende casa. Trátase d'Olga Cuervo, que nos dexará plasmaos y plasmaes otra vegada más pola so forma tan especial de contar, cola so propuesta nueva , "Elles tamién cuenten", na que pon voz a los cuentos d'anguaño escritos por autores asturianes. Sedrá'l 25 de marzu, a les 19:00 hores. 

La última actuación d'esti semestre tamién llega con una cara conocida, nesti casu, la de l'actriz Ana Morán, con una propuesta de cuentacuentos na que neños y neñes van xubise a los sos "Zapatos", pa poder asina vivir una montonera histories y aventures nueves y emocionantes. La cita sedrá'l 29 d'abril, a les 19:00 hores.

Tolos espectáculos van ser na Sala Escénica de la Factoría Cultural, con entrada llibre y de baldre hasta completar aforu. Sedrá obligatoriu l'usu de mázcara, y neños y neñes tendrán de dir con una persona adulta.

 

Calendariu d'actuaciones

  • 25 de febreru, 19.00 hores. Restolando, con David Varela.
  • 25 de marzu, 19.00 hores. Elles también cuenten II, con Olga Cuervo
  • 29 d'abril, 19.00 hores. Zapatos, con Ana Morán.
  • Cultura

También te puede interesar...