Contacto

585 neños y neñes participen nes actividaes de la VII "Folixa de Navidá" qu'organiza la Estaya de la Llingua, de la conceyalía de Normalización Llingüística, y que yá ye una cita tradicional del programa navidiegu avilesín. Cuentacuentos, teatru, poesía, música y los imprescindibles villancicos, formen parte d'una programación na que collabora l'alumnáu de les escueles Enrique Alonso, El Quirinal, Marcelo Gago, Poeta Juan Ochoa, La Carriona y Villalegre, Palacio Valdés y Sabugo. Sedrá esti vienres 15 d'avientu, dende les 10:30 hores, nel Auditoriu de la Casa la Cultura.

Amás de les escueles públiques d'Avilés nomes enantes, van participar nesta séptima Folixa de Navidá les actrices Olga Cuervo, como presentadora y narradora, y Ana Morán, como coordinadora. Collaboren tamién na so realización el grupu de teatru Santa Bárbara de Llaranes, l'Asociación Xuntanza d'Avilés y l'Asociación Garabuxada de L'Arena, que cederá de baldre al personaxe de L'Anguleru.

Nesta ocasión, tamién, el Nataliegu -un troncu de carbayu que se quemaba nes cases asturianes en Navidá, y del que se guardaba la povisa tol añu pa que diera bayura a la casa-  va tener munchu protagonismu.

Xunto a la representación del cuentacuentos "Un nataliegu perbullindiegu", de Vitu Pintado y Berto Peña, a cargo de l'actriz Olga Cuervo, nesta edición llevaráse a cabu una ufrienda al Nataliegu. Concretamente, alumnáu del CEIP Villalegre ofrecerá-y un puñáu de castañes a un Nataliegu que fixo pa esto la Escuela Cerámica del Conceyu d'Avilés. L'alumnáu del CEIP Marcelo Gago va cantar el "Villancicu d’El Nataliegu".

La xornada va pesllar cola interpretación de la obra de teatru "L'Aniversariu del Sol", a cargu del grupu de teatru Santa Bárbara de Llaranes.

Programa de la VII "Folixa de Navidá"

Vienres 15 d'avientu

Auditoriu de la Casa la Cultura

• 10.30 h.  Recibimientu y presentación, a cargu d'Olga Cuervo.           

• 10.33 h. Alumnáu del CEIP Enrique Alonso (15 neños y neñes del coru) canten “Yá baxen los pastores”.

• 10.40 h. Alumnáu del CEIP El Quirinal (12 neños y neñes) van lleer un poema escritu por ellos mesmos sobre L’Anguleru.

• 10.50 h. Alumnáu del CEIP Marcelo Gago (19 neños y neñes) canten el "Villancicu d’El Nataliegu".

• 11.00 h. Cuentacuentos "Un nataliegu perbullindiegu", de Vitu Pintado y Berto Peña, contáu pola actriz Olga Cuervo.

• 11.10 h. Saludu de L’Anguleru y Lolina a neños y neñes.

• 11.15 h. Alumnáu del CEIP Villalegre faen una ufrienda al Nataliegu.

• 11.20 h. Representación teatral: "L’ániversariu del Sol", a cargu del grupu de teatru Santa Bárbara de Llaranes.

II "Concursu de ramos de Navidá na escuela"

La Estaya de la Llingua d'Avilés convocó la segunda edición del "Concursu de Ramos de Navidá na escuela". Hasta'l xueves 14 d'avientu tará abiertu'l plazu pa la presentación de trabayos a esti concursu que ye pa les escueles públiques avilesies que quieran proponer al so alumnáu facer ramos con decoración propia de la Navidá asturiana, magar que también se pueden presentar ramos innovadores pero siempre calteniendo como base una estructura y decoración tradicionales.

Los centros educativos interesaos podrán algamar  un premiu consistente na representación d'un cuentacuentos o taller didáuticu nes sos propies instalaciones, nel horariu que s'escueya pa ello, o bien nun llote libros n'asturianu pa la biblioteca la escuela, en casu de nun poder acoyer dalguna de les nomaes actividaes por nun tener un espaciu afayadizu pa ello.

Pa confirmar la so participación los centros deberán escribir un corréu electrónicu a la direición estayallingua@aviles.es. Hasta'l 14 d'avientu podrán mandar hasta tres retratos del ramu fechu nes que se pueda ver claramente la so estructura como la so decoración. Los retratos tienen de mandase per WhatsApp al númberu 634 82 16 13.

Los criterios de valoración de los ramos so los que vienen darréu:

• Decoración: tendrán prioridá los ramos qu'usen elementos tradicionales, asina como los que se faigan con proporcionalidá y armonía.
• Origixinalidá: valórase l'usu d'elementos decorativos novedosos y diferentes, siempre y cuando tean bien integraos colos tradicionales.
• Estética: valoraránse los ramos de dos triángulos o dos pisos.

El fallu del xuráu fadráse públicu'l martes 19 d'avientu, comunicándose tamién al propiu centru ganador.