Contacto

'Ajo', Antón Caamaño, Lucía Menéndez, Ana Solís y Ángela García.

'Da-y a la llingua' Ye'l lema col que, dende la Conceyalía de Normalización Llingüística, s'anima a los avilesinos y les avilesines de toles edaes a participa y celebrar el "Día Internacional de la Llingua Materna", con un programa d'actividaes que se van facer el día 21 na Plaza España, dende les 12:00 hores. Pero, yá'l vienres 20, como anticipu y pa implicar a lo más piquiñino habrá una ronda conciertos a cargu del duu Mestura nes escuelines de 0 a 3 añps: EEI La Madalena (9:30 hores), EEI El Quirinal( 10:30 hores) y EEI La Toba (11:30 hores).

El programa d'actividaes con música tradicional asturiana y llectura de testos de diferentes llingües del mundu presentólu güei pela mañana la conceyala de Normalización Llingüística, Ana Solís acompañada de Santiago Gutiérrez 'Ajo' (gaiteru), Antón Caamaño (actor), y Lucía Menéndez y Ángela García de Cruz Roja que collaboran con esta iniciativa.

El sábadu 21, que ye cuando se celebra en tol mundu'l 'Día Internacional de la Llingua Materna' pa puxar pola diversidá lingüística y la educación multillingüe, n'Avilés la llingua sedrá la protagonista con un programa que tendrá como apertura, a les 12:00 hores, l'actuación d'Ajo Band qu'interpretará varios temes del so trabayu 'Puxa'. Ajo (Santiago Gutiérrez) ye un gaiteru asturianu veteranu, que tuvo nel grupu 'Trasgo', una de les formaciones pioneres del folk celta asturianu.

Darréu habrá una llectura de varios testos de diferentes idiomes (llituanu, portugués, oroko, wolof, yoruba, urdu, rusu, bereber, bámbara y hassamía) n'asturianu que llevará a cabu l'actor y direutor de teatru, Antón Caamaño. Tarán nesta xornada persones de varies nacionalidaes que presenten los textos na su llingua materna.

Pa terminar contaráse cola actuación musical de Mestura, qu'interpretarán dos temes: ún n'asturianu y otru en gallego-asturianu. Marisa López (voz) y Luis Suárez (guitarra) son los componentes del duu Mestura. Participen en muches iniciatives, combinándolo col so trabayu como profesores. La so andadura musical entamó hai unos 20 años, frutu de la so pasión compartida pola música y les cultures. D'ehí que nel so repertoriu incluyan temes propios y interpretaciones en varies llingües: castellán, asturianu, fala, portugués, francés y inglés, ente otres.