Contacto

Avilés pon a disposición de toles persones adultes interesaes un cursu de baldre de nivel básicu d'asturianu, enmarcáu nel proyeutu autonómicu Falamos. Va ser presencial, na sala d'esposiciones del Palaciu de Valdecarzana, como en llinia, n'ochobre y payares. L'entamu de les clases ye'l 5 d'ochobre.

Subvencionáu pola Conseyería de Cultura y Política Llingüística, xestionáu pola Federación Asturiana de Conceyos en collaboración col Conceyu d'Avilés, p'apuntase hai d'entrar al portal web del programa , falamos.info, y l'almisión fadráse según l'orden de matriculación.

El cursu ye de 42 hores, de les que 20 son presenciales, n'ocho sesiones que van ser los xueves, de 16:30 a 19:00 hores. Les demás hores van ser virtuales, per Internet.

Les aiciones formatives tienen l'envís de que l'alumnáu se desenvuelva n'asturianu en situaciones de la vida de tolos díes con estructures cencielles, lo mesmo de forma oral qu'escrita. Los temarios incluyen aspeutos rellacionaos col vocabulariu y la gramática: ámbitu personal y corporal, emocional y familiar; casa, pueblu y ciudá; comerciu y alimentación; trabayu y tiempu llibre. Asina como recursos llingüísticos que faen referencia a la natura, la bayura de cultures, viaxes, internet y medios de comunicación.

Les ocho sesiones programaes van ser los díes 5, 19 y 26 d'ochobre, asina como'l 2, 9, 16, 23 y 30 de payares.

Falamos ye un programa d'enseñanza non reglada de les llingües asturiana y gallego-asturiano pa persones adultes.

Oxetivos

En terminando'l cursu l'alumnáu sedrá quien a:

• Arreglase pa entendese en  situaciones normales que se dan tolos díes, lo mesmo cara a cara que nos medios téunicos.
• Comprender, producir, coproducir y procesar testos orales y escritos breves que traten d'asuntos personales de tolos díes  y que contengan estructures cencielles.

Conteníos

1. 1. Identificación personal y familia: alfabetu, sustantivu y axetivu, vocalismu final, vocabulariu rellacionáu, saludos, dispidíes y presentaciones, descripción de cualidaes físiques de les persones.
   2. Casa, pueblu y ciudá (espacios y servicios): artículu y preposiciones, apostrofación, vocabulariu rellacionáu, descripción d'oxetos, cases y sitios.
   3. Comerciu y alimentación: Demostrativos, numberales y indefiníos, vocabulariu rellacionáu, vezos y celebraciones, espresión de gustos y preferencies.
   4. El cuerpu y les emociones: Pronomes personales, posesivos, acentuación, vocabulariu rellacionáu, diálogos, indicaciones y conseyos
   5. Trabayu y tiempu llibre: Formes verbales básiques, vocabulariu rellacionáu, narración/descripción de dellos vezos y coses que pasen
   6. La natura/El clima: Alverbios, llocuciones, pronomes y alverbios interrogativos, vocabulariu rellacionáu, petición y ofrecimientu d'información del tiempu, descripción y actividaes na natura
   7. Internet y medios de comunicación: Estructures comparatives, vocabulariu rellacionáu, solicitú d'información formal y informal
   8. Viaxes y bayura de cultures: Conectores, vocabulariu rellacionáu, descripción de sitios/costumes, conseyos pa planificar un viaxe