Contacto

Avilés afaya pa toles persones adultes interesaes dos cursos de baldre de nivel intermediu d'asturianu y d'aniciu de gallego-asturiano, dientro'l proyeutu autonómicu Falamos. Fadránse en llinia y presencial, con siete sesiones nel Palaciu de Valdecarzana

Los dos cursos entamen en setiembre: el 9 de setiembre nel casu del cursu d'asturianu intermediu, con clases de 17:00 a 19:45 hores; y el 10 de setiembre el de gallego-asturiano, con sesiones de 16:30 a 19:15 hores.

Subvencionaos pola Conseyería de Cultura y Política Llingüística y xestionaos pola Federación Asturiana de Conceyos en collaboración col Conceyu d'Avilés, el plazu p'apuntase ta abiertu yá nel portal web del programa, falamos.info, y pa entrar nos cursosva respetase dafechu l'orde que se siguió p'apuntase.

Les aiciones formatives tienen l'envís de que l'alumnáu se desenvuelva n'asturianu en situaciones de tolos díes con estructures cencielles, lo mesmo falando qu'escribiendo. Los temarios incluyen aspeutos vinculaos al vocabulariu y la gramática: ámbitu personal y corporal, emocional y familiar; casa, pueblu y ciudá; comerciu y alimentación; trabayu y tiempu llibre. y tamién recursos llingüísticos n'entornos naturales, multiculturalidá, viaxes, Internet y medios de comunicación.