David García, conceyal de Normalización Llingüística d'Avilés, fizo entrega a l'Asociación de Vecinos El Hórreo del Carbayedo, del llibru editáu pol Conceyu colos rellatos premiaos y finalistes del Concursu de Rellatu Curtiu que la propia asociación vecinal entamó en 2007.

Un actu que se fizo nel Salón de Receiciones de la Casa Conceyu, nel que participaron representantes de l'Asociación. Nesti tomu tán los testos de los 15 años nos que se celebró, hasta'l so parón temporal en 2021.

Dende esti 2025 sedrá'l Conceyu d'Avilés, per aciu de la conceyalía de Normalización y la Estaya de la Llingua, el que retome la organización del premiu, cola so nueva convocatoria. Magar que yá entamó en  2024 a trabayar cola asociación na recopilación de los rellatos premiaos y finalistes presentaos dende l'añu 2007, cola idea d'editalos, como homenaxe al coleutivu vecinal El Hórreo, y reconociendo'l so llabor cultural y de promoción de la llingua y la cultura asturianes.

Orixe del premiu

Pa poder animar a la creación lliteraria en llingua asturiana, l'Asociación de Vecinos El Hórreo del Carbayedo, en collaboración cola Estaya de la Llingua del Conceyu d'Avilés creó en  2007 el concursu de microrrellatos en llingua asturiana "L'Horru d'El Carbayedo". El concursu organizóse dientro d'un día especial de les fiestes de San Roque del barriu, dedicáu a Asturies y a l'asturianía.