Contacto

La plaza Hermanos Orbón vuelve al so nome tradicional de plaza de Les Aceñes cola XX edición de la Seronda n'Avilés. La celebración de la seronda, los sos productos y les sos tradiciones más asturianes, van al empar de la bona comida y la música alegre y de raigón, protagonistes un añu más, esti fin de selmana que vien, el vienres 27 y el sábadu 28 d'ochobre.

Organizada pola Federación d'Asociaciones Xuntanza d'Avilés, el Conceyu d'Avilés y la collaboración de La Plaza y Caxa Rural d'Asturies, presentáronla güei pela mañana Yolanda Alonso, conceyala de Cultura d'Avilés; David García, conceyal de Normalización Llingüística, acompañaos por José Federico Álvarez Palacios, presidente de Xuntanza.

Avilés reivindica la bayura del patrimoniu cultural de la seronda asturiana, n'alcordanza y anguaño. Una carpa va presidir l'espaciu, na qu'un chigre de l'Asociación Cultural de Piniella tendrá coses mui riques pa comer, como sidra dulce, castañes o tortos.

Tamién habrá un escenariu, nel que la música va convertise nel otru protagonista grande del programa d'actividaes, yá dende la inauguración oficial, el vienres a les 19.15 hores (la carpa ábrese a les 19.00 hores) cola actuación de la Bandina Cuatrolán.

El mesmu vienres garrarán el relevu los bailles y soníos más tradicionales gracies al trabayu de Xaréu d'ochobre y Escontra'l raigañu, pa dempués volver a sentir la Bandina Cuatrolán y terminar col duu Casa Palma y la so personal recuperación y reinterpretación del folclore cántabru en fusión cola electrónica, a les 22.00 hores.

Pal otru día, el sábadu 28, entama too al mediudía, n'abriendo la carpa y el chigre a les 12.00 hores la música de la Bandina Xarangana, pa siguir colos cantares de chigre del Orfeón de Castrillón, como aperitivu perfeutu pa metese dafechu nel platu fuerte, la xinta popular con pote de berces y arroz con lleche, a les 14.00 hores.

Pela tarde, guardóse un espaciu pa la infancia que se va poder embarcar nuna  "Misión Samáin" mui especial, a les 17.15 hores. Dempués, la Banda de Música d'Avilés tocará col grupu de pandereteres Compañeras, enantes de que la gaita de Rubén Alba y la guitarra de Nel de Purnea dominen l'espaciu.

Pa poner el ramu, y xugando en casa, llegará'l gaiteru avilesín Jose Manuel Tejedor, col so Jose Manuel Tejedor Trío, a les 21.30 hores.

Programa XX Seronda N'Avilés

Vienres 27 d'ochobre

• 19.00 hores. Ábrese la carpa, con música popular d'animación y chigres con productos de seronda: sidra, castañes, tortos... Asociación Cultural de Piniella
• 19.15 hores. Inauguración oficial de la XX Seronda n'Avilés. Actuación de la Bandina Cuatrolán
• 20.00 hores. Amuesa de bailles y sones tradicionales con Xaréu d'ochobre y Escontra'l Raigañu
• 21.30 hores. Actuación de Bandina Cuatrolán
• 22.00 hores. Conciertu de Casa Palma

Sábadu 28 d'ochobre

• 12.00 hores. Ábrese la carpa cola Bandina Xarangana. Chigre con productos de seronda, de l'Asociación Cultural de Piniella
• 12.30 hores. Cantares de chigre col Orfeón de Castrillón
• 14.00 hores. Xinta popular: pote de berces y arroz con lleche
• 17.15 hores. Animación infantil "Misión Samaín"
• 19.00 hores. Actuación de la Banda de música d'Avilés col grupu Compañeras
• 20.30 hores. Actuación de Rubén Alba y Nel de Purnea
• 21.30 hores. Actuación de José Manuel Tejedor Trío