Contacto

Esti vienres, vuelve CaleyAvilés y les sos visites guiaes por Denis Soria, per sitios emblemáticos de la ciudá, con un paséu pel Cementeriu monumental de La Carriona. Entamada pola Estaya de la Llingua d'Avilés, la cita tendrá como puntu d'alcuentru'l Centru d'Interpretación del Cementeriu, cicLaC, a les 19.00 hores.

Son 15 places llibres en caúna de les visites de CaleyAvilés, y pa participar hai d'apuntase, de baldre, nel corréu electrónicu estayallingua@aviles.es, nel teléfonu 985 545 508 o pel WhatsApp nel 634 821 613.

El Cementeriu municipal de La Carriona ye ún de los más especiales del país, un verdaderu muséu d'arte al aire llibre y que ta dende 2010 dientro la Ruta Europea de Cementerios Significativos. Fechu a lo cabero'l sieglu XIX, ente'l so catálogu d'arte funerariu tien obres de Cipriano Folgueras o Manuel del Busto. 

Ellí tan enterraes figures mui importantes d'Avilés, dende l'escritor Armando Palacio Valdés al futbolista Enrique Castro 'Quini'. Tien espacios de memoria como'l monumentu nomáu Llosa del Tiempu, creáu por un equipu que tien como  cabezaleru al artista Carlos Suárez.  

Denis Soria, guía oficial del Principáu d'Asturies, conducirá'l percorríu.

En xunetu, el día 28, los y les caminantes van metiéndose peles cais del monumental Cascu Históricu d'Avilés, con una parada especial na capieya de Las Alas. El sitiu p'aconceyase sedrá la plaza España, delantre la Casa Conceyu.

Yá pa terminar esti añu, el tradicional barriu marineru de Sabugo sedrá'l compañeru de la última de les visites, que se va facer el 25 d'agostu. La visita entama, como nun podría ser d'otra forma, dende la plaza d'El Carbayo, delantre la Ilesia vieya de Sabugo.

Los y les menores que participen nes visites tendrán de dir acompañaes d'un adultu. Asinamesmo, recomiéndase dir con  calzáu cómodo.

Calendariu de visites

• Vienres 30 de xunu.  Cementeriu La Carriona
• Vienres 28 de xunetu. Cascu Históricu
• Vienres 25 d'agostu. Barriu de Sabugo