Un flashmob coloríu que busca sorprender a les persones qu'anden pela plaza pondrá'l ramu a les actividaes que se fueron desenvolviendo nestos últimos díes per tol territoriu, pola celebración de la 47ª edición de la 'Selmana de les Lletres Asturianes'. Sedrá n'Avilés esti domingu 10 de mayu, na plaza España, enfrente la Casa Conceyu. Dende les 12:30 hores dirá caleciendo l'ambiente con un speaker pa dir preparando un eventu nel que la lliteratura y l'asturianu danse la mano reblagando sieglos d'historia.
L'actu central va entamar a les 13:00 hores enfrente la Casa Conceyu ta dedicáu a la figura de la dramaturga Taresa Cónsul, autora del primer testu teatral escritu en llingua asturiana que se tien documentáu que lu estrenó una muyer. Ye un entemés que se representó la primer vez nel Monasteriu La Vega d'Uviéu en 1789 y que la Selmana de les Lletres recupera pa pesllar la celebración.
La Caracola Iniciativas Sociales y les Pandereteres d´Avilés y Corvera recibirán a Taresa Cónsul y a Jovellanos que tarán encarnaos pola actriz María López Barrio y pol actor Antón Caamaño respeutivamente.
Tres el cuadru escénicu, pesllarán el flashmob les Pandereteres con tres temes y la Caracola con una coreografía de pieslle.
L'actividá ta organizada pol Principáu d'Asturies cola collaboración del Conceyu d'Avilés.
- Normalización Llingüística