Vuelven los talleres infantiles "Pa que nun t'aburras" a los Centros Culturales de los barrios d'Avilés, a La Xungarosa/El barrio de La Luz, La Carriona y Los Canapés. Una forma bien prestosa y didáutica de normalizar l'asturianu, gracies a los "Cuentos con munchu arte", que se van facer n'ochobre y payares.

Presentólos güei pela mañana David García, conceyal de Normalización Llingüística d'Avilés, la conceyala de Mocedá, Raquel Ruiz, acompañaos pola educadora infantil Rosa Cuervo, d'Aladanza, Educación y Tradición, que sedrá quien los dea.

Son dos los talleres que se van dar, pa neñes y neños de 4 a 8 años, como parte de la programación de la Conceyalía de Normalización Llingüística nos Centros Culturales de la ciudá, en collaboración cola Conceyalía de Facienda, Turismu, Comerciu y Mocedá. N'ochobre, el turnu ye de "Bruxes males, bones bruxes", de Francisco Pimiango; y en payares llegará "Un nataliegu perbullindiegu", de Vitu Pintado y Berto Peña.

En "Bruxes males, bones bruxes" asoleyaránse los secretos meyor guardaos de les recetes d'hai milenta años colos que se van poder preparar remedios maraviyosos y pócimes máxiques, con ingredientes que faen plasmar, como lombardes, vinagre y otros productos naturales. Dempués van, siguir pasándolo bien con papel y cartón, faciendo bruxes pa llevar pa casa...

En "Un nataliegu perbullindiegu", con palos de madera, rosquielles y llazos deprenderán a construyir y iguar un ramu tradicional de Navidá, anunciando les feches tan naguaes polo más piquiñino de la casa.

Los talleres, con 15 places caún pa cada centru, sedrán dende les 18.00 a les 19.30 hores. El plazu p'apuntase yá ta abiertu, y puede facese diendo a les biblioteques de cada centru cultural, per WhatsApp al númberu 634 821 613, per corréu electrónicu na direición estayallingua@aviles.es o per teléfonu nel 985 545 508.

Calendariu

"Bruxes males, bones bruxes" 

• 6 d'ochobre. La Xungarosa/El barrio de La Luz
• 20 d'ochobre. Los Canapés
• 27 d'ochobre. La Carriona

"Un nataliegu perbullindiegu"

• 10 de payares. La Carriona
• 17 de payares. La Xungarosa/El barrio de La Luz
• 24 de payares. Los Canapés