Contacto

La conceyalía de Normalización Llingüística retoma la campaña "El to nome diz muncho de ti", qu'informa de les posibilidaes qu'hai na llexislación y los pasos que se tienen de dar p'adautar los nomes y los apellíos a les sos formes tradicionales n'asturianu.

Ta empobinada principalmente pa les persones más moces mayores d'edá, pero tamién pensando en quien va a tener fíos o fíes, tien un vinilu grande na plaza España, nel que se puede, per aciu d'un códigu QR, conocer tolo que tien que saber si se quieren facer esos cambios, siguiendo les lleis qu'hai pa ello.

Tamién hai información detallada  na web municipal, www.aviles.es nel apartáu d'Adolescencia y Mocedá nun desplegable na parte de la conceyalía de Normalización Llingüística. Ehí puede descargase'l dípticu  qu'hai en formatu pdf nel que s'esplica la historia de dalgunos nomes y apellíos tradicionales n'asturianu (con una llista de dalgún d'ellos), y tamién los procedimientos necesarios.

Por exemplu, solicitar un certificáu d'equivalencia de les formes tradicionales que tien de dalu dalgún organismu oficial, como pue ser el Serviciu de Política Llingüística del Gobiernu d'Asturies, pa dempués dir al Rexistru Civil y a les oficines onde se saca'l DNI.

La campaña protexe la bayura llingüística, recordando que'l nome identifica a cada persona nel mundu, faciéndolo dende la tradición d'Asturies.

• DÍPTICU