Contacto

El mes de mayu n'Avilés ta llaráu d'actividaes n'asturianu, organizaes pola Estaya de la Llingua dende la Conceyalía de Normalización Llingüística. Talleres infantiles, visites teatralizaes o alcuentros lliterarios componen un menú qu'inclui la celebración de la Selmana de les Lletres Asturianes.

Presentóles güei pela mañana David García, conceyal de Normalización Llingüística d'Avilés, acompañáu por Montserrat Machicado, responsable de la Estaya de la Llingua.

Destacó l'edil la presentación del documental "Atiendi Asturies, atiendi, 50 años de Conceyu Bable", coleutivu pioneru al que ta dedicada la XLV Selmana de les Lletres Asturianes. La proyeición contará cola intervención d'ún de los fundadores de Conceyu Bable, el maestru, biólogu, escritor, pintor y académicu de la Llingua Asturiana, l'avilesín Miguel Solís Santos. Sedrá'l 2 de mayu nel salón d'actos del Palaciu de Valdecarzana a les 19.00 hores.

Pero les actividaes van entamar pronto, el mesmu llunes que vien, el 29 d'abril. Nesta fecha retomaránse les visites teatralizaes al parque Ferrera, una actividá incluyía n'axenda ufiertada pola conceyalía d'Educación a les escueles d'Avilés, y que entamaron a facese nel añu 2018.

Guiaes polos intérpretes profesionales Ana Morán y Borja Roces, espliquen d'una forma lúdica la historia'l parque y el so xardín francés, asina como los árboles más espectaculares qu'hai nél y los más rrepresentativos de la cultura asturiana. Van ser cinco díes de visites, participando 8 escueles d'Avilés, con un total de 348 escolinos y escolines.

Son éstes:

Llunes 29 d'abril

• 10.30 hores. El Quirinal (32 escolares) y Versalles (18 escolares)
• 12.00 hores. El Quirinal (32 escolares)

Martes 30 d'abril

• 10.30 hores. Poeta Juan Ochoa (43 escolares)

Llunes 6 de mayu

• 10.30 hores. La Carriona (35 escolares)
• 12.00 hores. Enrique Alonso (48 escolares)

Miércoles 8 de mayu

• 10.30 hores. Palacio Valdés (47 escolares)

Vienres 10 de mayu

• 10.30 hores. Luisa de Marillac (32 escolares)
• 12.00 hores. Salesianos (50 escolares)

Caleyavilés

Tamién con visita teatralizada vuelve otra de les actividaes yá tradicionales y con un públicu fiel, Caleyavilés. Nesti casu, revivirá a una de les escritores pioneres n'asturianu, y d'Avilés, la maestra del sieglu XIX Matilde Soignie.

Sedrá la mesma autora la que va esplicar al públicu asistente les sos vivencies y escritos, onde vivió y per onde paseó pela ciudá, nuna producción de Cuatro Gotes preparada de forma esclusiva p'Avilés, que nos va dexar conocer d'una forma lúdica a esta autora avilesina.

Sedrá la primera de cinco visites que se van facer pela ciudá con dalguna novedá bien prestosa, y que terminen en setiembre. Con un aforu llimitáu a 25 places, ye necesario apuntase primero. Hai varies formes, per WhatsApp nel teléfonu 634 821 613, llamando al 985 545 508 o con un corréu electrónicu a la direición estayallingua@aviles.es

Talleres nos centros culturales con Rosa Cuervo

Siguen tamién los talleres nos centros culturales de La Carriona, La Xungarosa/El barrio de La Luz y Los Canapés, col "Aperitivu Prehistóricu" que podremos tastiar cola cuyar prehistórica que vamos facer con Rosa Cuervo, de l'Asociación Aladanza, pa neñes y neños de 4 a 8 años. Una forma d'esplicar los recursos alimenticios de los que disponía la humanidá na prehistoria y los preseso que teníen pa comelos. Hai 15 places pa cada taller, y empiecen a les 18:00 hores nestes feches:

• Vienres 10 de mayu, La Carriona
• Vienres 17 de mayu, La Xungarosa/El barrio de La Luz
• Vienres 31 de mayu, Los Canapés

Susana Sela na escuela Palacio Valdés

La escritora Susana Sela presentará al alumnáu de la escuela Palacio Valdés el su últimu libru de literatura infantil, "La invasión de los trasgos", nel que van trabayar tol mes de mayu, pa dempués plantega-y delles entrugues a l'autora nel alcuentru que van tener con ella'l martes 28 de mayu a les 10.00 hores.

La Conceyalía de Normalización Llingüística entragará dalgunos exemplares a la escuela, que pasarán a formar parte de los recursos del propiu centru, como material escolar y de la biblioteca.

¿Cuála ye?

Ye un xuegu diseñáu pola empresa avilesina Acuto Xuegos, asemeyáu al tradicional y perconocíu Trivial, pero neto con entrugues rellacionaes con Asturies y la cultura asturiana. La conceyalía mercó cinco xuegos cola idea de poder entregalos nos cinco centros públicos d'Educación Secundaria y Bachilleratu qu'hai na ciudá y que de dalguna manera lu puedan usar como recursu de los propios centros.