Contacto

Caminar la ciudá y conocer los sos secretos contaos n'asturianu. Asina ye CaleyAvilés, una de les actividaes emblemátiques organizaes pola Estaya de la Llingua de la conceyalía de Cultura. Regresa con cuatro visites guiaes nueves a otros tantos espacios mui especiales, una tolos meses hasta'l mes d'agostu. La primera, al Muséu de la Historia Urbana el xueves 18 de mayu.  

Dempués, sedrá un vienres de cada mes, y dempués vien el 30 de xunu el Cementeriu La Carriona, el 28 de xunetu, el Cascu Históricu, y el 25 d'agostu, el Barriu de Sabugo. Denis Soria, guía oficial del Principáu d'Asturies, va ser l'encargáu de conduciles.

Toles visites van entamar a les 19.00 hores y van durar alrodiu d'una hora y media. Tienen 15 places llibres pa caúna, son de baldre, pero hai d'apuntase enantes per corréu electrónicu estayallingua@aviles.es, per teléfonu nel 985 545 508 o pel Whatsapp nel 634 821 613.

La primer visita coincide cola celebración del Día Internacional de los Museos, el 18 de mayu. El puntu d'alcuentru ye dientro'l mesmu MHUA, institución que recueye y esparde la historia milenaria de la ciudá, p'apuntase puede facese nel Muséu, nel corréu electrónicu museodeaviles@aviles.es y nel teléfonu 985 565 512.

La segunda va percorrer el 30 de xunu'l Cementeriu La Carriona, ún de los cementerios más especiales del país, auténticu muséu d'arte al aire llibre y que ta dende 2010 dientro la Ruta Europea de Cementerios Significativos. La cita, ye nel Centru d'Interpretación del Cementeriu La Carriona, cicLaC.

En xunetu, el día 28, les y los caminantes van dir entemeciéndose pente les cais del monumental Cascu Históricu d'Avilés, con una parada especial na capiya de Las Alas. El sitiu pa xuntase va ser la plaza España, delantre la Casa Conceyu.

Pa terminar, el tradicional barriu marineru de Sabugo sedrá'l compañeru de la última visita, pal 25 d'agostu. Salse de la plaza'l Carbayo, delantre la ilesia vieya de Sabugo, nun podría salise d'otru sitiu meyor.

Los y les menores que participen nes visites tendrán de dir con una persona adulta. Recomiéndase llevar calzáu cómodo.

Calendariu de visites

• Xueves 18 de mayu. Muséu de la Historia Urbana d'Avilés
• Vienres 30 de xunu.  Cementeriu La Carriona
• Vienres 28 de xunetu. Cascu Históricu
• Vienres 25 d'agostu. Barriu de Sabugo