El Conceyu d'Avilés xunto cola empresa Ruasa pa puxar pol comerciu llariegu pone en funcionamientu una iniciativa pa beneficiase de dos hores de baldre nel aparcamientu d'El Atrio, que ta na cai Cuba. Ye fácil poder conseguilo. Sólo se necesita que'l cliente o la clienta dempués d'aparcar el coche, faiga una compra a partir de 10 euros nún de los más de cien comercios que se xuneron a esta iniciativa. Saber qué comercios son ye fácil, porque tienen una pegatina nel escaparate. Al salir coles compres hai d'entregar na cabina de control del aparcamientu'l tique que dea'l comerciu. 

Podrán xunise a esti programa negocios pequeños con un llocal d'accesu públicu que tea n'Avilés y daos d'alta nos grupos 64 o 65 del IAE (esceuto los del epígrafe 652.1 y el grupu 655). En cuantes que Ruasa mande la conformidá per corréu electrónicu señaláu pola entidá que lo solicite (nun plazu como muncho de 72 hores), el comerciu considérase xunidu y tendrá que poner la pegatina nel so negociu. 

Los requisitos pa que Ruasa aplique a los y les clientes del so aparcamientu d'El Atrio'l descuentu de dos hores son estos:

1.- Que'l comerciu tenga la confirmación de que se metió nel Programa, confirmación que-y tien que mandar  Ruasa (La rellación completa de los comercios que tán xuníos a esti programa podrá consultase na web www.ruasa.com).
2.- Que'l cliente o la clienta meta'l coche nel aparcamientu de Ruasa d'El Atrio (cai Cuba) enantes de comprar.
3.- Que cuando se vaya a pagar se dea na cabina de control del aparcamientu un tique de compra de 10 euros o más (col IVA ) nun comerciu que tea dientro'l Programa con fecha d'esi día y hora de la compra dempués d'entrar col coche nél, siendo esti l'únicu documentu que sirve pa que RUASA aplique'l descuentu. El documentu va ser orixinal y nun podrá tener correiciones nin tachadures.
Nun se va poder usar pa otra cosa nin pa otru descuentu. 

Les solicitúes de los establecimientos pa participar d'esta iniciativa puede facese con un formulariu qu'hai en www.ruasa.com o mandar a info@ruasa.com l'archivu col modelu de solicitú que ta na web.