Autores nel Camín

Información

 

Autores nel Camín ye un programa que ñaz en 2021 p'averar a la ciudadanía los y les autores ganadores de los premios lliterarios y artísticos organizaos pola Conseyería de Cultura, Política Llingüística y Turismu. Esti circuitu da la posibilidá de llevar per tol territoriu asturianu actividaes culturales en las llingües propies ensin que-yos cueste nada a los Conceyos que deciden faceles. 

N'Avilés yá se contó con autores y artistes nos dos últimos años, como Blanca Fernández Quintana, Rodrigo Cuevas, González Barreñada o Algaire, per aciu d'un conveniu firmáu ente'l Principáu d'Asturies y el Conceyu d'Avilés. 

Esti añu entama un nuevu ciclu'l día 7 de xunu y con él la conceyalía de Normalización  súmase a les actividaes culturales de la Nueche Blanca qu'habrá per tolos requexos de la ciudá con una actuación de Vero Rubio y la so banda na Factoría Cultural, onde la música y l'asturianu tamién tendrán el so espaciu nel que la instrumentista tendrá un alcuentru col públicu. Tamién, ye la primer premiada d'esti añu del Ciclu Autores nel Camín 2024  que llega a Avilés. Sedrá a les 22:00 hores. La entrada ye llibre hasta completar aforu. 

Vero Rubio cola so banda foi la ganadora del Premiu Camaretá al Meyor Cantar  2023. esti premiu convócase dende 2007 y dende 2020 pasó a nomase tal como ye agora pa rendir homenaxe a "Camaretá", el primer grupu musical y lliterariu del Surdimientu, formáu en Samartín del Rei Aurelio en 1975. Dende ellí xurdieron músicos o grupos como Nuberu, Nel Xiblata o los poetes Manuel Asur y Xuan Marcos. El premiu, que con esta actuación de Vero Rubio na Nueche Blanca d'Avilés sedrá la primer cita del añu del Ciclu Autores nel camín, busca promocionar les canciones n'asturianu de cualquier xéneru, con lletra y música orixinales, o con lletra orixinal de melodíes que yá había enantes. 

Verónica Rodríguez Rubio, más conocida como Vero Rubio, ñació en Cangas del Narcea en 1981. Esta multiinstrumentista toca'l pianu, la trompeta, la trompa y el bodhram. La so trayectoria xurde dende la música clásica que-y dio la oportunidá de trabayar con orquestes como la Orquesta Sinfónica de Barcelona y Nacional de Catalunya (O.B.C.), y el del jazz.  Anguaño toca con grupos de folk, rock, improvisación llibre, jazz. Al mesmu tiempu que trabaya colos grupos ye compositora y productora musical.

Calca nesti enllaz pa ver el vidiu promocional: https://we.tl/t-a5kENOwQXC

< Volver

Últimas noticias