Autores nel Camín

Información

Autores nel Camín ye un programa que ñaz en 2021 p'averar a la ciudadanía los y les autores ganadores de los premios lliterarios y artísticos organizaos pola Conseyería de Cultura, Política Llingüística y Turismu. Esti circuitu da la posibilidá de llevar per tol territoriu asturianu actividaes culturales en las llingües propies ensin que-yos cueste nada a los Conceyos que deciden faceles. 

Dende la Conceyalía de Normalización Llingüística del Conceyu d'Avilés, preténdese averar a la mocedá a nomaos y nomaes autores qu'escriben n'asturianu, pa que s'interese pola lliteratura llariega y puxar pol usu de la llingua asturiana.

N'Avilés yá se contó con autores y artistes nos dos últimos años, como Blanca Fernández Quintana, Rodrigo Cuevas, González Barreñada o Algaire, per aciu d'un conveniu firmáu ente'l Principáu d'Asturies y el Conceyu d'Avilés. 

Esti añu entamó un nuevu ciclu'l día 7 de xunu y con él, la conceyalía de Normalización  sumóse a les actividaes culturales de la Nueche Blanca  con una actuación de Vero Rubio y la so banda na Factoría Cultural,  Tamién, foi la primer premiada d'esti añu del Ciclu Autores nel Camín 2024  que llegó a Avilés.

Agora hai tres alcuentros programaos dientro d'esti ciclu y son estos: nel IES Carreño Miranda con Beatriz Quintana Coro (el 14 d'ochobre, 12:25 hores), nel IES La Luz con Xon de la Campa (el 16 d'ochobre, 12:15 hores); y el terceru nel IES La Magdalena con Héctor Braga (el 8 de payares, hora por confirmar). Los tres alcuentros contarán cola presencia del conceyal de Normalización Llingüística, David García.


Beatriz Quintana Coro
Estudió'l grau de Llingües Modernes y les sos Lliteratures na Universidá d'Oviedo/Uviéu y trabaya como profesora d'enseñanza secundaria. Como escritora collaboró na revista Lliteratura, qu'edita l'Academia de la Llingua Asturiana, y l'añu pasáu resultó ganadora de la VII edición del concursu Entaína a escribir, de rellatios curtios improvisaos.  
Na novela La tráxica hestoria de cómo Abraham mató la música, ganadora de la tercer edición del Premiu Enriqueta González Rubín de narrativa moza n'asturianu y reconocida pol xuráu del galardón "pola orixinalidá del so argumentu y la narración fresca y bien estructurada, qu'ofrez un viaxe temporal pela música clásica”, la escritora crea un rellatu de mieu con dellos acontecimientos tráxicos que pasen en varios sitios distintos y époques de la historia xuníos por un elementu común. 
 
Xon de la Campa 
Dibuxante y escritor, yel ganador del premiu Alfonso Iglesias de cómic 2023 cola so obra Misteriu nel soterrañu . Ye miembru del conseyu editorial ' Ediciones Radagast amás de ser l'ilustrador del primer títulu d'esta casa: “Depués d’Ochobre”. Daquella p'acá vien siendo'l responsable de munches de les portaes más mítiques de la editorial como son, La Rexenta contra Drácula, L’horru de Vapor, Fort Paniceiros o 1809. Como autor participó nes antoloxíes 78 Crímenes, 78 Conceyos y L’Horru de Vapor.


Héctor Braga
Músicu ganador de la venti nueve edición del premiu 'Máximo Fuertes Acevedo' d'ensayu en llingua asturiana cola obra entitulada 'Nel cantu la memoria. Ensayu sobro l’asturianada tradicional', destacando pola so aportación al estudiu y espardimientu de la música y de la cultura asturianes. Pal xuráu, ye un trabayu rigurosu y bien documentáu sobre la asturianada, nel que s'atiende a tolos ámbitos qu'intervienen nesta gran seña cultural d'Asturies. Amás, el fallu resalta “l'usu d'un llinguax natural, frescu y correutu que-y da soltura a la llectura de la obra y eso presta”.

< Volver

Últimas noticias