Contacto

Foi'l primer edificiu noble llevantáu fuera la ciudá amurallada, al sur d'ella, lo que significó, dende'l puntu de vista urbanísticu, un gran avance p'Avilés. La Casa Conceyu construyóse nel sieglu XVII, siguiendo los planos del arquiteutu Juan de Estrada, que s'inspiró na recién llevantada Casa Conceyu de la capital del Principáu. 

L'edificiu tien dos pisos. Nel so tiempu, el d'abaxo del too, perbaxo los soportales, alquilábase p'actividaes comerciales con un sitiu más puestu enriba, que sieglos dempués tamién se fizo na  plaza del Mercáu (o de los Hnos. Orbón o de Les Aceñes).El primer pisu tenía dos sales grandes p'aconceyase y otros espacios más pequeños pa l'actividá propia del conceyu, que d'aquella yera mui poca.

Nel sieglu XIX añádese-y una torre con reló. Güei, el palalciu ta dedicáu sólo a xeres d'orde políticu alministrativu. Dientro hai de destacar La escalera del mediu, con una cristalera mui vistosa enriba d'ella y un salón de receiciones preciosu.

La construcción dempués de la casa de García Pumarino  y del palaciu del Marqués de Ferrera, foi l'entamu del primer espardimientu de la ciudá medieval que veía como yuera imposible siguir creciendo por culpa la muralla. Esti desarrollu urbanu comozse como "l'ensanche burgués". Y dio orixen a la plaza España  y al nacimientu de dos cais: Rivero, el camín Real a Uviéu y Galiana, en direición a la parte más de d'aldea de Grao.

La Casa Conceyu tuvo munchos estropicios, por culpa les bombes que cayeron encima l'edificiu na  Guerra Civil de 1936.