Contacto

En visitando la catedral de San Salvador, síguese pal norte pasando peles cais como la d'El Águila, Gascona (famosa poles sos sidreríes), Foncalada (onde ta la fonte prerrománica) etc, percorriendo la ciudá ensin perdese nin un poco, porque en toles cais hai una concha que marca'l camín. Pasando pela avenida de Pumarín, avenida de Pando, Villamaxil y Fitoria salse de la ciudá y pa la derecha, gárrase una carretera llocal que va pa La Estrecha y Cuyences. A mediu quilómetru d'ellí, diendo pal norte, a mandrecha hai un camín que pasa per La Granxa, Laviada, La Pedrera y Ponte Cayés, penriba'l ríu Nora.  
En Campiello síguese una pista mui curtia que se xune a la carretera llocal Ll-1, mui cerca d'un polígonu industrial y al aeródromu de La Morgal, y que va pa Posada, capital del conceyu de Llanera. Dende ellí gárrase la carretera y bordeando un llau del Monte de Santufirme, la ruta remonta hasta l'Altu La Miranda, pa baxar dempués pasando per delantre la fonte de Simplicio y la carretera AS-17.

Síguese pela carretera llocal Ll-9, travesando les víes del tren y garrando'l camín que cruza'l ríu Villar. Per equí éntrase nel conceyu Corvera pelos pueblos de La Sota y Solís. Darréu pásase per Cancienes hasta llegar a Nubledo/Nubleo, d'ehí a El Portazgo/El Portalgo, onde ta la ermita La Consolación, y en pasando Los Campos, el pelegrín y la pelegrina lleguen a Avilés dende onde s'enllaza col Camín de la Costa.