Contacto

Vamos entamar el segundu día visitando'l Cementeriu de la Carriona (cicLaC) El cementeriu construyóse  nel sieglu XIX y ye un auténticu muséu al aire llibre d'arte funerariu. Ricardo Marcos Bausá foi l'arquiteutu y tien muncha importancia histórica y artística; poro, ta dientro l'ASCE (Association of Significant Cementeries in Europe), amás de qu'Avilés ye cabezalera nel proyeutu EUCEMET, sigles n'inglés de "Cementerios europeos: xardinos d'almes, diversidá y patrimoniu". 

Dempués vamos pal Conceyu vecinu de Castrillón, ensin salir de la Comarca Avilés , onde podremos visitar la zona costera y el  Paséu de la Playa de Salinas, una  de les más grandes del Principáu. A lo último la playa ta'l Muséu d'Ancles al aire llibre, dedicáu a Philippe Cousteau.

Salinas desque nos años 70 afitóse como sitiu pa veranear y de segundes residencies, creció nos últimos años como un sitiu imprescindible pa facer Surf , acoyendo varios festivales y competiciones mui importantes lo mesmo a nivel nacional como internacional.

En visitando Salinas, vamos volver pal centru d'Avilés a la cai más famosa de la ciudá: Galiana,  una de les más populares y más paseada de la villa, onde, lo mesmo na so parte más alta, como na zona de la  Plaza d'El Carbayedo , podemos atopar una montonera sitios pa comer.

Pela tarde, empobinarémosnos pal centru cultural más importante de la ciudá, el Centru Niemeyer, obra única nel nuestru país del nomáu arquiteutu brasileñu, Oscar Niemeyer. Inauguráu en 2011, déxanos descubrir tolos sos espacios y la so historia nes visites guiaes que nos ofrez. Ye ún de los referentes culturales y y turísticos del Principáu, amás d'un símbolu del cambiu d'Avilés.  

Tien una coleición propia de varies obres y tamién ofrez esposiciones de pasu tol añu. En terminando esta visita, vamos pal  Espaciu Portus, un centru d'interpretación de l'Autoridá Portuaria, onde vamos poder conocer la historia y el patrimoniu del Puertu d'Avilés al traviés de los sieglos.

El día vamos terminalu disfrutando del atapecer dende'l Faru d'Avilés, mirador privilexáu de la ciudá y la so costa.