Contacto

La Factoría Cultural, centru artísticu multidisciplinar avilesín, ta nel edificiu de lo que foi l'antigua fábrica de camises Confecciones Camino, construyíu en 1950, pa dedicase a una actividá textil. 

En 2007 entamaron les obres de la Factoría Cultural, abriendo les sos puertes en 2010, dependiendo de la Fundación Municipal de Cultura del Conceyu d'Avilés, que-y da un presupuestu añal pa que funcione. 

L'edificiu ocupa 4.500 m2, tien cinco plantes ocupaes  por una sala fornos cerámicos, sales d'esposiciones, cuatro sales d'ensayu pa músicos, sala escénica con un aforu de 120 persones y grada que se puede guardar, sala de danza, taller de grabáu, cuatro talleres p'artistes plásticos (residencies artístiques), sala de pintura, pantalla pa proyeiciones de vidiu-arte na facada de fuera (La Ventana de la Factoría), FabLab con impresores 3D, cortadora láser, cortadora de vinilos, máquina de risografía y biblioteca. 

Ún de los pegoyos de la Factoría Cultural ye'l de la formación, y nel so edificiu ta la Escuela Municipal de Cerámica, centru inauguráu na plaza de Camposagrado hai 37 años, no agora ye la sala d'esposiciones de pasu Antigua Escuela de Cerámica. (Dáse-y esti nome pa cuidar la memoria del que foi ún de los centros d'enseñances artístiques más importantes d'España), dependiente del Muséu de la Historia Urbana d'Avilés, qu'al abrise  fizo que se tuviere que llevar la Escuela en 2010 a estes nueves instalaciones. 

La Escuela Municipal de Cerámica, fundóse colos finxos de l'alfarería tradicional de Miranda, averándose poco a poco a la cerámica d'anguaño. De toes formes, l'alfarería sigue incluyéndose nes téuniques y materies que se dan nel centru.  

Como centru formativu na Factoría Cultural desendólquense varios talleres artsiticos y culturales dende la Universidá Popular d'Avilés, de la Federación Española d'Universidaes Populares y otros monográficos.  

Ún de los sos fines ye'l sofitu a la diversidá facilitando la integración a través del arte. 

La Factoría Cultural pretende ser un viveru d'emprendedores rellacionaos cola creación artística en toles sos disciplines; música, danza, teatru, diseñu, retratos, cerámica, pintura, grabáu, vidriu..., aumentando l'ayuda a la creación y a les iniciatives culturales como condición necesaria pa un espoxigue mayor de la ciudá. 

Hai de destacar la coordinación de les Nueches Blanques (Beltaine) y Nueches Negres (Samain) coles que se pretende sacar l'arte a la cai, averándolo y asoleyándolo a la ciudadanía. 

La formación pa rapacinos y rapacines y pa la mocedá faise pel branu col so Campus Artísticu, y a lo llargo del cursu escolar col programa Descubirendo l'arte. Son actividaes pa los centros educativos. 

La música tien un papel importante col ciclu de conciertos Factoría Sound.

Certamen de pintura rápida pa neños y neñes y persones adultes, con bona acoyida y muncha participación.  

Feria de Cerámica cola presencia d'artistes nacionales y internacionales destacando la concesión del Premiu de Cerámica Villa d'Avilés. 

Dende 2015, danse ocho ayudes económiques pa sofitar, puxar y esparder la producción artística nel campu de les artes plástiques, gráfiques, escéniques...

La Factoría Cultural ta escoyida pol Programa Europa Creativa de la Comisión Europea participando en varios proyeutos y residencies artístiques como: Wom@rts, Innovate, Symbols, 4H Creat, Eucemet, Z Elemets.

Agospia fondos d'obra de diferentes artistes (Cristina Cuesta, Ramón Rodríguez, Consuelo Vallina...)

Facebook: https://www.facebook.com/factoriacultural.aviles
Instagram: https://www.instagram.com/factoriaculturalaviles/?hl=es

Llunes a vienres:  09:00 a 14:30h / 16:30 a 21:00h
HORARIU DE BRANU (de xunetu a setiembre)
Llunes a vienres:  9:00 a 14:30h

Telf.: 985 548 617
Corréu Electrónicu: abarrio@aviles.es

Factoría Cultural d'Avilés
Av de Portugal, 13
33402 Avilés. Asturies