Contacto

Ye'l centru históricu d'Avilés dende hai sieglos. Esta plaza orixinal y popular, tamién conocía col nome de "El Parche", ye una zona petonal grande que se carauteriza polos soportales que xunen los edificios del so perímetru.

La plaza ye del sieglu XVII. Naquella dómina la mayor parte la villa vivía protexía pola muralla medieval, pero yá nun se pudieron contruyir más edificios dientro porque creció la población. Esti crecimientu urbanu llamóse "ensanche barrocu" y por culpa d'él, xunto cola plaza, llevantáronse tres de los sos palacios más importantes: El Palaciu Municipal o Casa Conceyu, El Palaciu de Llano Ponte o Casa de García Pumarino y el Palaciu de Ferrera.

Anguaño, la Plaza España ta considerada'l quilómetru cero d'Avilés. Ye un sitiu nel que avilesinos y avilesines tán muncho y tamién les persones que vienen de turistes pa disfrutar del so entornu monumental y del so gran ambiente, animáu y con munchos bares, cafeteríes y terraces.

D'ella salen les cais más típiques y concurríes de la ciudá: La Ferrería, La Cámara, Rivero, San Francisco y La Fruta.

A la xente que vien a visitala présta-y muncho, dexando testimoniu d'ello. L'escritor y periodista Juan Cueto Alas escribe na so "Guía secreta de Asturias" que si lo primero que viéramos de la villa avilesina fuera esta plaza vieya, de xuro pensaríamos que nos confundiéramos de sieglu, o que yera que taben rodando una película d'ambiente renacentista". O tamién el direutor Carlos Saura, al visitar la ciudá pola so esposición "Luz" nel  Centru Niemeyer, dixi "La primer vez que vine a Avilés, vi que la plaza España, grande y bona, yera un cruce de caminos onde se xuntaba la vida de la ciudá. La so lluz y la so xente son un placer pa la mio mirada".

Hai poco, el blog del portal turísticu "Niumba" de "Tripadvisor" publicaba un artículu sobre les 20 places más guapes d'España y ehí taba la Plaza España d'Avilés, xunto con otres tan emblemátiques como les places mayores de Madrid y Salamanca, la Plaza del Obradoiro de Santiago de Compostela y la Plaza de España de Sevilla