El programa municipal 'Avilés alquila'. que xestiona la Oficina de Vivienda d'Avilés (OVA), garra fuerza en 2022 al roblar 29 contratos no que va d'añu. Esta iniciativa, qu'entamó n'Asturies en 2012, actualizóse a lo último del añu pasáu pa poder dar más garantíes a la xestión de la ufierta y la demanda de cases n'alquiler na ciudá.
Asina, frente a los 13 contratos formalizaos en tol 2021, yá son más del doble los firmaos no que va de 2022, confirmando la bona acoyida que tien lo mesmo pa quien tien una casa p'alquilar como pa quien la alquila.
'Avilés Alquila' tien como oxetivos:
1. Facer que les viviendes del Conceyu d'Avilés, de ropiedá privada, sse metan nel mercáu del alquiler con un sistema de garantíes pa propietarios y propietaries.
2. Bon preciu y otres ventayes pa quien quier alquilar una casa.
Esti programa sofítase na nomada "collaboración público-privada", proque la Oficina de Vivienda d'Avilés (OVA) va trabayar coles diez inmobiliaries más representatives de la ciudá pa dinamizar y xestionar la oferta y la demanda de cases na ciudá.
Mantién un conveniu de collaboración cola Cámara de Comerciu d'Avilés, p'afayar una "mediación" en casu de que nun hubiere un alcuerdu ente quien tien la casa p'alquilar y quien la quier alquilar.
Llantóse un sistema de garantíes, con un coste qu'asume la OVA, pa dar confianza y tranquilidá al propietariu o propietaria, con unes pólices de seguros que garanticen que se va a cobrar la renta (12 meses), tolo que tea estropeao na casa cuando quede vacía y l'asistencia xurídica, amás d'un seguru de Responsabilidá Civil pal inquilinu o inquilina. Too esto pa poder fomentar la participación nel programa de propietarios o propietaries de cases vacíes.
A los posibles inquilinos o inquilines pídese-yos unos ingresos mínimos que demuestren que pueden pagar l'alquiler -polo menos del 1,2 del IPREM-, contratu indefiníu y que lo que cueste la renta nun seya más del terciu de los sos ingresos netos mensulaes. Pero, si nun se cumple dalgún de los requisitos, hai la posibilidá de presentar aval.
A cambiu de les garantíes que s'ofrecen, la OVA llanta unos precios máximos de los alquileres, según onde tea la casa, garantizando precios más competitivos que nel mercáu d'agora. El programa, coles garantíes que dan quien alquila y quier quier alquilar, intenta facer que la ufierta vaya medrando nel Conceyu, al tiempu de que los precios vayan baxando y asina los que necesiten una casa puedan tener más posibilidaes de tener una casa con un alquiler afayadizu.
Portal web
Amás, la OVA, pretende facilitar y garantizar a la ciudadanía l'accesu a la información, y pa ello, tien un portal web de pisos que ta nel portal municipal www.aviles.es, na so estaya de vivienda (www.aviles.es/vivienda/aviles-alquila). Ehí, cada inmobiliaria collaboradora publica la información y les semeyes de los pisos, pa que persones d'Avilés, d'Asturies o foriates puedan velos, filtrando la información según lo que necesiten o lo que-yos preste más, la zona onde tán, los cuartos que tien, númberu de metros cuadraos, el preciu como muncho que cuesta l'alquiler, etc.
Amás, na seición nomada "Vive n'Avilés", hai una radiografía de los barrios de la ciudá, coles carauterístiques de la so población y los recursos públicos qu'ufierten al vecindariu.
Con esti programa renováu, Avilés busca beneficiar a les persones que viven na ciudá, dando confianza a quien tien pisos p'alquilar equí, con bonos alquileres, lo mesmo pa les persones que viven n'Avilés como a les persones que se planteguen vivir nesta ciudá y entamar un proyeutu de vida nuevu.
Les bases del programa pueden consultase en www.aviles.es/vivienda/aviles-alquila, tamién se puede entruga-yos a los y les Axentes Collaboradores que tán na mesma web y tamién na OVA na so sede d'El Nodo (C/El Balandro, 16).
Compatibilidá col Bonu Xoven
La participación como inquilinu o inquilina nel programa 'Avilés Alquila' ye compatible cola solicitú y perceición del Bonu Xoven, una ayuda económica al pagu de la renta d'alquiler de vivienda llanzada hai poco pol Principáu d'Asturies.
L'oxetivu del Bonu Xoven ye que s'esfrute d'una vivienda o d'un cuartu d'alquiler o como cesión d'usu a les persones moces con pocos medios económicos, dando ayudes directes a les persones qu'alquilen o a les cesionaries.
Podrán algamar estes ayudes del Bonu Alquiler Xoven les persones físiques mayores d'edá que cumplan tolos requisitos del programa, que tán na web https://sede.asturias.es/-/dboid269000074395023607573
- Personas y Bienestar