Contacto

642 neños y neñes participen nes actividaes de la VIII "Folixa de Navidá" qu'organiza la Estaya de la Llingua, de la conceyalía de Normalización Llingüística, y que yá ye una cita tradicional del programa navidiegu avilesín. Cuentacuentos, teatru, poesía, música y los imprescindibles villancicos, formen parte d'una programación na que collabora l'alumnáu de les escueles Enrique Alonso, Marcelo Gago, Poeta Juan Ochoa, Villalegre, Palacio Valdés, Sabugo y Principado. Sedrá esti vienres 13 d'avientu, dende les 10:30 hores, nel Auditoriu de la Casa la Cultura.

Amás de les escueles d'Avilés nomaes enantes, van participar nesta octava Folixa de Navidá les actrices Olga Cuervo, como presentadora y narradora, y Ana Morán, como coordinadora. Collaboren tamién na so realización el grupu de teatru Santa Bárbara de Llaranes, l'Asociación Xuntanza d'Avilés y l'Asociación Garabuxada de L'Arena.

Xunto a la representación del cuentacuentos a cargo de l'actriz Olga Cuervo, nesta edición habrá "Caxes máxiques" enllenes d'ilusiones y bonos deseyos.

Programa de la VIII "Folixa de Navidá"

Vienres 13 d'avientu

Auditoriu de la Casa la Cultura

• 10.30 h.  Recibimientu y presentación, a cargu d'Olga Cuervo.           

• 10.33 h. Alumnáu del CEIP Sabugo canten “El Ramín de Nadal”.
• 10.35 h. Alumnáu del CEIP Villalegre canten "El lluceru de Navidá".
• 10.38 h. Alumnáu del CEIP Poeta Juan Ochoa canten un villancicu asturianu             .
• 10.42 h. Cuentacuentos "Caxa d'lusiones" a cargu d'Olga Cuervo
• 11.00 h. Saludu de L’Anguleru, Xesús y Lolina a neños y neñes.
• 11.05 h. Comitiva de Les caxes máxiques.
• 11.17 h. Representación d'una picina de teatru alusivu al tema de les tradiciones navidiegues, a cargu del grupu de teatru Santa Bárbara de Llaranes.
• 11.25 h. Pieslle coles gaites y el tambor de Xaréu d'ochobre que toquen una pieza n'honor de L'anguleru y la so comitiva

III "Concursu de ramos de Navidá na escuela"

La Estaya de la Llingua d'Avilés convocó la tercer edición del "Concursu de Ramos de Navidá na escuela". Hasta'l vienres 13 d'avientu tará abiertu'l plazu pa la presentación de trabayos a esti concursu que ye pa les escueles avilesines que quieran proponer al so alumnáu facer ramos con decoración propia de la Navidá asturiana, magar que también se pueden presentar ramos innovadores pero siempre calteniendo como base una estructura y decoración tradicionales.

Los centros educativos interesaos podrán algamar  un premiu consistente na representación d'un cuentacuentos o taller didáuticu nes sos propies instalaciones, nel horariu que s'escueya pa ello, o bien nun llote libros n'asturianu pa la biblioteca la escuela, en casu de nun poder acoyer dalguna de les nomaes actividaes por nun tener un espaciu afayadizu pa ello.

Pa confirmar la so participación los centros deberán escribir un corréu electrónicu a la direición estayallingua@aviles.es. Hasta'l 13 d'avientu podrán mandar hasta tres retratos del ramu fechu nes que se pueda ver claramente la so estructura como la so decoración. Los retratos tienen de mandase per WhatsApp al númberu 634 82 16 13.

Los criterios de valoración de los ramos son los que vienen darréu:

• Decoración: tendrán prioridá los ramos qu'usen elementos tradicionales, asina como los que se faigan con proporcionalidá y armonía.
• Origixinalidá: valórase l'usu d'elementos decorativos novedosos y diferentes, siempre y cuando tean bien integraos colos tradicionales.
• Estética: valoraránse los ramos de dos triángulos o dos pisos.

El fallu del xuráu fadráse públicu'l xueves 19 d'avientu, comunicándose tamién al propiu centru ganador.