Contacto

Un total de 85 persones mayores de 60 años, repartíes en 10 grupos focales, participaron na primer parte de la fase de diagnósticu del proyeutu Avilés Ciudá Amigable coles Persones Mayores, una iniciativa que persigue la participación d'esta estaya de la población en tomar decisiones, col envís de dir siendo mayores d'una forma sana y activa.
Repartíos y repartíes en 10 grupos focales, estos ciudadanos y ciudadanes pudieron espresar les sos impresiones sobre les 8 aries del entornu urbanu y social propuestes acordies col Protocolu de Vancouver diseñáu pola Organización Mundial de la Salú.

Estes aries son:
1.    Espacios al aire y edificios
2.    Tresporte y movilidá
3.    Vivienda 
4.    Respetu y inclusión social
5.    Participación social
6.    Comunicación y información
7.    Trabayu y participación ciudadana 
8.Servicios Sociales y de la Salú 

En total fueron 21 los alcuentros celebraos, caún d'ellos de dos hores de duración, que se desenvolvieron en distintos puntos del conceyu, n'espacios que trabayen davezu con persones mayores y son puntu de referencia pa éstes na ciudá, como los centros de mayores de Les Meanes, La Xungarosa/El barrio de La Luz y Xardín de Cantos, el Centru Social de Llaranes, el Centru Sociocultural de Los Canapés o la Residencia d'El Nodo.
Pa estes sesiones, el personal municipal de la aria de Promoción Social cuntó amás cola collaboración voluntaria de Cruz Roxa Avilés, lo mesmo que cola mocedá del programa Conecta Xoven que collaboró, entamáu pol aria de Mocedá pa deprender a usar ferramienta de les nueves teunoloxíes a persones mayores. 
Tamién echaron un gabitu distintes aries municipales qu'apurrieron idees y propuestes.

Los grupos focales tuvieron ente 8 y 10 persones ente los 60 y los 74 años, persones de más de 75 años (procurando qu'haya siempres representación de mayores de 85), niveles socio-económicos distintos (tomando como referencia'l mediu de la zona, non el de la persona), distintos graos de discapacidá, y grupos étnicos y culturales minoritarios.

L'oxetivu ye qu'estos grupos seyann representativos de la diversidá y bayura del coleutivu de persones mayores d'Avilés, contando conque les opiniones recoyíes seyan un reflexu lo más fiel posible de les sos realidaes y vivencies del sitiu nel que viven.

Siguientes fases
Remataes les sesiones de los grupos focales de persones mayores de 60 años, yá empezó'l trabayu colos grupos focales nos que tán profesionales rellacionaos cola atención a mayores. Pa ello preparóse un cuestionariu específicu (tanto en formatu dixital como en papel), que se podrá compaxinar con facer delles entrevistes individuales y/o grupales. 

Con toos estos datos va analizase tola información recoyida en cada grupu focal p'algamar un diagnósticu final. Con él daráse por rematada esta fase d'evaluación inicial de situación y necesidaes.

Ta previsto que pa la seronda de 2022 s'asoleyen los resultaos del diagnósticu final, pa plantegar delles propuestes que van ser la base del futuru Plan d'Aición llocal que va trayer dempués un siguimientu y evaluación, en presentando los resultaos a toles persones, organismos y entidaes implicaes na so fechura.

Antecedentes
La entrada d'Avilés na Rede Mundial de Ciudaes y Comunidaes Amigables coles Persones Mayores apautóla'l  Plenu municipal n'agostu de 2020 y roblóla n'abril de 2021 l'IMSERSO, organismu que coordina n'España una rede impulsada pola Organización Mundial de la Salú (OMS) pa la década del Avieyamientu Saludable (2021-2030), nel marcu de l'Axenda 2030 y los Oxetivos de Desarrollu Sostenible.

Les primeres aiciones del proyeutu Avilés Ciudá Amigable coles Persones Mayores fueron en payares de 2021, primero garrando les primeres persones participantes y presentando, en xineru de 2022, el plan pa dar un diagnósticu.
Amás de desenvolvese les primeres actuaciones de difusión informativa del proyeutu, al traviés de formatos físicos y dixitales, púnxose en funcionamientu un formulariu pa que les persones mayores voluntaries que quixeren se pudieren apuntar nestos grupos focales. Recoyéronse 126 solicitúes, anque a lo cabero fuero 85 les persones escoyíes y que podíen tar dientro d'estos10 grupos formaos.