Dende la Fundación Municipal de Cultura d'Avilés y la Factoría cultural d'Avilés convócase otru añu más la Feria la Cerámica d'Avilés. Sedrá la XLII edición que va tener como sede la Plaza Domingo Álvarez Acebal. Amás de la feria, habrá una esposición na Casa la Cultura de les pieces que se presentaron al Concursu Villa d'Avilés, que cumple la so XXXIV edición.
La Feria ye pa los díes 26, 27 y 28 d'agostu, vienres, sábadu y domingu, coincidiendo coles Fiestes de San Agustín. Habrá como muncho 20 puestos en casetes de madera. L'horariu sedrá de 11:00 a 15:00 y de 17:00 a 21:00 hores.
Les persones interesaes en participar tendrán qu'apuntase per corréu electrónicu: feriadeceramicaaviles@gmail.com o per corréu postal na Factoría Cultural (Avenida de Portugal, 13. 33402 Avilés (Asturies).
Amás de la ficha qu'hai d'escribir p'apuntase, habrán d'amestase 3 retratos representativos de dalguna de les pieces que se van esponer na caseta.
Cada espositor o espositora participará con una pieza na esposición coleutiva y tendrá de mandar un retratu de la obra cola que quiera participar nel concursu del premiu Villa d'Avilés. El premiu ye de 700 € y inclui una eeposición na Galería Amaga www.galeriaamaga.com.
El vienres 5 d'agostu pieslla'l plazu de presentación de solicitúes pa participar na feria.
- Fiestas y Festejos