Contacto

El segundu Festival de Teatru Clásicu Bances Candamo d'Avilés yá ta en camín. Va ser p'agostu, pero faciendo una parada primero, que-y va dar munchu prestixu: la primer producción propia del certame, "El español más desgraciado amigo, Mazías (La poesía mata)", va representase nel escaparate más importante del teatru del Sieglu d'Oru, el Festival Internacional d'Almagro, el 9 de xunetu.

Traxicomedia escrita por Francisco Bances Candamo, nacíu en Sabugo en 1662, ye una propuesta de la conceyalía de Cultura d'Avilés; les compañíes asturianes Arte Producciones y EPO Producciones; Gesteatral, de Madrid, y Atakama, d'Extremadura. Cuenta col respaldu del Real Institutu d'Estudios Asturianos, RIDEA.

Presentóla'l día 24 pela mañana nel Foyer del Teatru Palacio Valdés Yolanda Alonso, conceyala de Cultura d'Avilés, acompañada pol actor, dramaturgu y direutor teatral Ángel García Suárez, que fizo l'adautación y tamién s'encarga de la direición de la obra; amás del productor y tol elencu.

Destacó Alonso "la importancia de recuperar y valorar el patrimoniu cultural tan ricu que tien la ciudá, nesti casu la obra de Francisco Bances Candamo, qu'amás nos recuerda la histórica vinculación d'Avilés col teatru. Por eso llanzamos l'añu pasáu'l festival que lleva'l so nome. Poner en marcha esta función ye mui importante, y que s'estrene na capital del teatru clásicu español, como ye'l Festival de Almagro, col que queremos afondar na nuesa collaboración, ye un arguyu".

Sorrayó tamién "l'enorme esfuerzu que supón sacar p'alantre un proyeutu tan ilusionante, nel que s'implicaron grandes profesionales de la cultura d'Avilés y d'Asturies, y nel que nos acompañen nomes fundamentales de la escena española. A toos ellos, equí presentes, y a los que nun tán, quiero agradece-yos el so gran trabayu".

Una obra coral, con un repartu encabezáu por Nuria Gallardo, una de les dives del teatru español, y Zorión Eguileor, con una carrera na escena y nel cine bien afitada, y que refuercen Eduardo Castejón, Natalia Suárez Ríos, Jorge Moreno, Rocío Montero, Vanesa Estráviz, Enrique Dueñes, Fran Roldán, Mario Villar y Ana Madera.

El direutor, Ángel García Suárez, arrodióse d'un gran equipu, col productor Javier Puyol, José Rico y Francisco Palomino, que xunten esperiencia y saber; Carlos Abad na direición téunica; Alfonso González Arenas na producción executiva; Juan Ignacio Mortera ye l'ayudante de direición, y Manuela Álvarez, l'apuntadora.

Na parte téunica, la implicación de los y les profesionales d'Avilés y d'Asturies foi clave. Asina, el músicu José Manuel Tejedor ye'l responsable de l'ambientación musical; el diseñador Constantino Menéndez, "Made by kÖs", de la ropa; la escenografía, de Carlos Alberto Abad y Esther Cuesta; preseos, de Taller Avilés; la esgrima y armes, de Pelayo Mejido, de la Escuela d'Esgrima Antigua d'Asturies; el diseñu gráficu, de Carlos Abad y Laidi R, y la parte audiovisual, de Francisco Pulido Fotografía.

La obra va formar parte del segundu Festival Bances Candamo, que nació con una idea clara: revivir la obra teatral del autor, contribuyendo al oxetivu de convertir a Avilés na referencia del teatru clásicu nel norte, una ciudá qu'atraiga la mirada de la industria cultural, al empar emisora y destín d'otros proyeutos teatrales.

Ensayos

El direutor, Ángel García Suárez, lleva más d'un mes de trabayu personalizáu colos y coles intérpretes, qu'ayeri realizaron la primer llectura conxunta del llibretu, nel auditoriu del Centru Cultural de Los Canapés. Les sesiones de montaxe de la función fadráse en xunu nel Centru Cultural de La Carriona.

Argumentu
Ye una comedia clásica d'enriedu bien prestosa; una comedia tráxica o una traxedia pa rise; una obra qu'adauta la lleenda del bardu Mazías, llarada de contradicciones aparentes, na qu'a partir d'una trama n'apariencia cenciella, Bances Candamo fai asomar costumes de la época qu'entá güei lleguen al día a día, como les diferencies ente estamentos sociales, la conceición de la familia, o la lliberación de la muyer de les convenciones y opresiones patriarcales.

Con una mirada crítica al amor románticu como fondu, el soñador Mazías, poeta probe, español desconfiáu y testerón, el paciente cero de la tremenda enfermedá del amor cola qu'hai de terminar enantes de que contaxe ensin remediu a Margarita, va apasionando a tolos que s'atopen nel so camín y texendo una tela araña de despropósitos que va acabar atrapándolu y matándolu.

Estrenu

La obra va estrenase nel Festival de Teatru Clásicu d'Almagro, el sábadu 9 de xunetu a les 22.45 hores, nel escenariu de la Casa Palaciu de Juan de Jedler, d'esi pueblu.

Ficha téunica

Autor. Francisco Bances Candamo

Nació en 1662 na cai d'atrás del barriu de Sabugo, qu'anguaño lleva'l so nome. La muerte del padre y la falta de medios de la madre fai que marchen pa Sevilla a vivir, pa ingresar ella nun conventu y quedar él  al cargu del so tíu, canónigu de la catedral.  Dempués de completar los sos estudios y destacar pola so maña coles lletres viaxa a Madrid, onde llueu empieza a destacar y ser cocíu na corte, llegando unos años dempués a ocupar el puestu de dramaturgu de cámara del rei Carlos II, el postreru de los Austrias.

El final del reináu coincide col so abandonu de la corte y la dedicación de dramaturgu pa ocupar distintos puestos na alministración. Acosáu polos sos enemigos, muerre enantes de tiempu en circunstancies nunca esclariaes en 1702, cuando exercía como xuez inquisidor en Lezuza, onde lu enterraron“de llimosna".

Na so autoría cuenten delles decenes de comedies, una producción poética grande y una riestra curiosa d'entemeses, autos sacramentales y moxigangues, pero destaca tamién el manual “Teatru de los teatros de los pasaos y presentes sieglos”, qu'amesta diez años d'estudiu y esperiencia teatral y nel que desenvuelve la so teoría teatral, defendiendo la vocación didáutica del teatru y de les representaciones, adelantándose a otros estudios del sieglu XVIII.

Direutor. Ángel García Suárez

Dempués de tar na RESAD de Madrid, onde estudió con reconocíos profesores, como José Estruch o Antonio Malonda, ente otros, empecipió la so carrera, desenvolviéndola nuna triple faceta d'actor, direutor d'escena y dramaturgu, dende hai más de trenta años.

Como actor trabayó con direutores mui nomaos, destacando'l so llabor na Compañía Nacional de Teatru Clásicu, a les ordenes d'Adolfo Marsillach, José Luis Alonso Mañas, Miguel Narros o José Carlos Plaza, nun total d'once espectáculos. Tamién tuvo en compañíes independientes como Gayo Vallecano, con Juan Margallo y Petra Martínez. Tamién trabayó en televisión, con personaxes episódicos en series como "Cuéntame", "La que se avecina" o "Gran Reserva".

Como direutor d'escena estrenó más de 15 espectáculos, ente los que destaquen "De fuera vendrá", de Moreto; "Entre bobos anda el juego", cola compañía Strión, de la que foi sociu fundador xunto a Aitana Sánchez-Gijón, Carlos Abad o, Fernando Guillén Cuervo, entre otros. Dirixó, amás d'a los nomaos y les nomaes enantes, a Fernando Conde, Iñaki Miramón, Cayetana Guillén, Ana Ruiz, Andrés Llima, Nancho Novo, Paco Manzanedo, Luis Bermejo y un llargu etcétera d'intérpretes. Mientres dellos años foi direutor de l'Agrupación La Luciérnaga, de la ONCE de Madrid.

Como autor y dramaturgu, dalgunes de les sos versiones d'obres clásiques estrenáronse  nel Festival Internacional de Teatru Clásicu d'Almagro ("El parecido en la corte" y "De fuera vendrá", de Moreto, ente otres). La so obra "Thriller imposible" escoyóse pa participar nel eventu Madrid Capital Cultural Europea en 1992.

Anguaño normalmente da clases y talleres, y fai de "coach" de profesionales de les artes escéniques.