Contacto

El Festival de Curtiometraxes Avilés Acción abre una convocatoria pa participar nel proyeutu cinematográficu Avilés 1924, cien años después, consistente nel rodaxe d'una película cola ayuda de los avilesinos y les avilesines que quieran participar.

L'oxetivu del proyeutu cinematográficu ye'l de faer una película cola visión de vecinos y vecines d'Avilés de la so ciudá. Pa ello, Avilés Acción fai un brinde a avilesinos y avilesines a grabar vidios de hasta un minutu de duración nos que tienen qu'enseñar la vida que lleven n'Avilés y mandalos a la organización enantes del 15 d'agostu. El resultáu del montaxe final proyeutaráse la gala d'inauguración de la 23 edición d'Avilés Acción, que va ser el prósimu 5 d'ochobre na Casa la Cultura.  

Con esta empresa, Avilés Acción pretende rendir homenaxe a la película más antigua grabada n'Avilés, Avilés 1924, nel so centenariu. La película ye la primera que se conserva de les que se rodaron na ciudá naquelles primeres décades de la historia'l cine, lo que supón un testimoniu visual de la visita a Avilés que, nel mes d'agostu d'aquel añu, fizo una delegación del estáu americanu de La Florida p'acompañar  los restos de Pedro Menéndez. La cinta remasterizóse y metióse-y sonidu en 2019 dempués de la collaboración ente'l Conceyu d'Avilés, Avilés Acción, el Conservatoriu d'Uviéu y Juan Bonifacio Lorenzo, direutor de l'antigua Filmoteca d'Asturies. Dempués d'echala na gala d'inauguración d'Avilés Acción 2022, el pasáu añu, el Festival rindió un nuevo homenaxe a esta obra al convocar la primer vegada'l Premiu Avilés 1924, col oxetivu de valorar la trayeutoria profesional de los cineastes asturianos.

Asina, un sieglu dempués de rodase aquella película, Avilés Acción convida a los avilesinos y les avilesines o a cualquier persona que grabe n'Avilés pa crear una película coleutiva, grabada ente tol mundu y onde se vean reflexáu'l so día a día, esmoliciones, suaños y llerces, basándose nel conceutu de les películes Life in a Day (Kevin Macdonald, Loressa Clisby y Tegan Bukowski, Reinu Xuníu, 2011) y Spain in a Day, inspirada na primera y dirixida por Isabel Coixet, en 2016, en recibiendo más de veintidós mil vidios d'españoles a los y les que primero convidaron a grabar les sos vides y contestar a preguntes como qué te presta, a qué tienes mieu, por qué nagües,  qué crees.

Pa más información y participación, entrar en: https://avilesaccion.com/aviles-2024-la-pelicula/