Contacto

Con 150 músicos xuntos nun miemu escenariu. Asina celebrará Avilés, por quinta ocasión, la Fiesta la Música, col puxu del Conceyu d'Avilés y el Conservatoriu Municipal Profesional "Julián Orbón".

Sedrá'l martes, 21 de xunu, na Casa la Cultura. El recital, que va entamar a les 20 hores, contará cola participación de vocalistes y instrumentistes de 8 formaciones instrumentales y corales avilesines. Sedrá un conciertu de baldre, con entrada llibre hasta completar aforu.  

A la Banda Sinfónica, la Orquesta Sinfónica y el Coru del Conservatoriu van xunise instrumentistes y coralistes de la Banda de Música d'Avilés, el Coru Amigos de Sabugo,  la Coral Polifónica del Centru Asturianu, el Coru Contracanto, el Coru Amigos de Miranda.

Xuntos formarán el martes una gran orquesta y un inmensu coru que interpretarán un repertoriu popular y abondo conocíu pol públicu.

Xuacu Llaneza, Iván Cuervo y Marcos Malnero sedrán los direutores del conciertu na so parte instrumental. Les voces de les cinco agrupaciones corales participantes tarán dirixíes por Isabel Baigorri (alumnáu del Coru de Enseñances Profesionales del Conservatoriu), Fran Carreño (Coru Contracanto), Soledad Rodríguez  (Coru Amigos de Miranda),  José Manuel San Emeterio (Coral Polifónica del Centru Asturianu) y Elena Baigorri (Coru Amigos de Sabugo).

N'actuación d'esti ensame de talentu musical avilesinu van sonar pieces bien conocíes de la música (pasodobles, zarzueles y música de cine), xunto con dalgún coru d'ópera tamién bien conocíu, nun repertoriu preparáu por toles agrupaciones que participen. A elles va xuníse-yos profesoráu y alumnáu d'otres époques del Conservatoriu Municipal como collaboradores. 

Sedrá la quinta vez qu'Avilés se xuna a la celebración de la Fiesta la Música, cita de tolos años que, coincidiendo col solsticiu de veranu, dase en munchos sitios del planeta. Dende que se creó en Francia nel añu 1982, foi creciendo hasta convertise nuna de les mayores amueses culturales del mundu, celebrándo la última edición en 120 países.