Contacto

Avilés tendrá dientro poco cinco espacios recreativos per tol Conceyu pa poder soltar a les perres y a los perros. Taben pidiéndose muncho estos espacios y por eso, la conceyalía de Mantenimientu trabaya nel diseñu y va mercar material p'afayar estos espacios nuevos. 

Acutáronse 50.000€ del presupuestu del Conceyu poner curioses estes zones canines de los parques, pa dar cabida a nuevos espacios onde los animales puedan xugar en llibertá cumpliendo la ordenanza nueva.

De los cinco espacios proyectaos, tres van ser nuevos y los otros dos van ponese más curiosos, como'l de Valgranda o'l que ta xunto al Pabellón d'Esposiciones de La Madalena. Los espacios nuevos pa soltar a los perros y a les perres tarán nos parques de Versalles y La Madalena, asina como nel Paséu de la Ría en Llaranes. 

La inversión global de la llicitación xube a 1.420.507 euros y tien un plazu d'execución de 8 meses. Va ser cofinanciada nun 80% pol Fondu Européu de Desarrollu Rexonal (FEDER) de la Xunión Europea, al tar incluyida na Estratexa de Desarrollu Urbanu Sostenible Integráu (EDUSI) d'Avilés. El proyeutu pa la renovación integral del Parque de Versalles va suponer tamién que s'igüe una zona zarrada. Les obres tán agora en fase de contratación y presentaron ufiertes trés empreses.

El Paséu la Ría ye otra de les zones verdes nes que'l Conceyu d'Avilés proyectó la igua d'una zona pa que los perros anden sueltos, ente les antigües Bateríes de Cok y Llaranes. Va zarrase un zona grande pa que les mascotes anden sueltes, con una fonte, bancos y elementos que-yos sirvan pa la so axilidá.

Dempués de dotar el presupuestu pa ello, anguaño ta redactándose'l proyeutu pa zarrar, poner fontes y el mobiliariu urbanu necesariu, pa que yá se pueda usar too na seronda. Pondráse dempués del espaciu saludable que tamién va incluyir elementos deportivos y que quier pidir una subvención a la Federación Española de Conceyos y Provincies (FEMP) pa ello.