Contacto

Historia
Ente los años 1919 y 1921, la Residencia d'Estudiantes de Madrid, dependiente de la Institución Llibre d'Enseñanza, entamó una campaña pa puxar poles biblioteques populares pa poder facer llegar la educación a les persones adultes. 

Al empar d'esta campaña, n'Asturies xurdió un movimientu bibliotecariu, , puxando por una burguesía reformista, col envís de tresmitir les bondaes de la cultura a toles clases sociales. Esti movimientu viose n'Avilés cuando en 1919, por iniciativa del diputáu del Partidu Reformista, José Manuel Pedregal, constituyóse una comisión organizadora pa crear una biblioteca popular. 

Lo mesmo nesta comisión, como nel primer patronatu encargáu de xestionala, taben avilesinos nomaos como Wenceslao Carreño, David Arias, Manuel G. Wes, ente otros, y Fortunato Sánchez Calvo como cabezaleru d'ellos. El Conceyu collaboró nel proyeutu iguando una clase del edificiu de les Escueles Nacionales de San Francisco, y comprometiéndose a dar una subvención tolos años.  

Asina ñació la Biblioteca Popular Circulante, que s'inauguró oficialmente'l 1 d'avientu de 1919 y, nos tres primeros meses de vida, tuvo yá 3.594 llectores y una media mensual de 291 préstamos. Dende esi momentu y hasta 1936 foi direutor  Luis Menéndez Alonso Lumen, que desenvolvió un llabor intensu d'organización de la coleición, cola publicación de varios catálogos xenerales y apéndices, y de difusión cultural. Prueba d'ello ye qu'en 1926 el so fondu creció hasta los 6.000 volúmenes y, nesti tiempu citáu, rexistráronse conferenciantes tan importantes como Miguel de Unamuno, Gerardo Diego o Valle Inclán. 

En 1935 terminóse l'edificiu nuevu de la biblioteca, na cai Ruiz de Alda, que pudo facese gracies a una suscripción popular. Pero, al terminar la Guerra Civil, l'edificiu ocupólu Falanxe Española, y el so fondu documental lleváronlu pal Institutu d'Enseñanza Media Carreño Miranda. Ellí destruyéronse unos 3.000 volúmnenes, de los aprosimadamente 10.000 que tenía ahsta esi momentu. 
En 1939 creóse'l Centru Coordinador de Biblioteques d'Asturies, y la biblioteca avilesina pasó a tar dientro d'él. Na posguerra hubo poca actividá, la desorganziación del fondu y que les instalaciones nun taben bien facía que fuera mui enguedeyao desenvolver el llabor bibliotecariu, y puxábase sobre too por tornar al propiu edificiu. Esto pasó en 1949, fecha na que yá se llamó Bances Candamo, igual qu'agora, n'honor de escritor Francisco Bances Candamo ñacíu n'Avilés en 1662. En 1965 inauguróse la sala infantil de llectura, la primera que se construyó nuna biblioteca asturiana. Dende 1989, la bilioteca taba nun edificiu onde se facíen varies actividaes, la Casa la Cultura, que taba na plaza Domingo Álvarez Acebal. 

Coleición
La coleición de la biblioteca ta formada por más de 100.000 documentos, en soportes diferentes. La mayoría son monografíes, pero tamién se pueden ver publicaciones  periódiques, grabaciones sonores, DVD y documentos electrónicos. 
A la mayor parte del fondu puede algamase ensin problema. Ta formáu por documentos modernos y organizáu en diferentes estayes, pa cubrir les necesidaes d'información y ociu d'un públicu infantil y adultu. Los exemplares que por varios motivos, tienen una proteición especial y conservación, tán en depósitu, y son menos que los d'enantes. Nel Catálogu Coleutivu del Patrimoniu Bibliográficu Español tán catalogaos más de 1.500 exemplares de la coleición de la Biblioteca Bances Candamo.

En Cifres
Fondos: 109.692 (Datos de 2022)
Socios y socies: 26.598 (Datos de 2022)

Servicios
La biblioteca ofrez dellos servicios pal públicu infantil y adultu.

P'Adultos
Pa persones mayores de 14 años.
•    Seición d'empréstamos: ta nel primer pisu y ye pa socios y socies de la bilbioteca, ofreciéndo-yos munchos documentos en soportes diferentes y d'accesu llibre. 
•    Seición de consulta: ta nel segundu pisu y tien 100 puestos pa consultar el fondu documental, con obres de referencia ordenaes por estayes temátiques, n'accesu llibre. Tamién equí se puede consultar una parte de los fondos del depósitu, solicitándolo primero y con autorización. 
•    Publicaciones periódicas: la biblioteca pon a disposición de tolos usuarios y toles usuaries una esbilla periódicos y revistes d'actualidá, que pueden lleese n'otros 56 puestos reservaos pa ello na sala de consulta nomada. 
•    Accesu a Internet: puede entrase n'Internet en 8 ordenadores que tán nel segundu pisu.
•    Préstamu interbibliotecariu: da la posibilidá d'atopar y consultar exemplares d'otres biblioteques públiques.
•    Sala d'estudiu: espaciu que ta nel segundu pisu, con 110 puestos reservaos pa esto.
•    Actividaes culturales: club de Llectura, presentación de llibros, conferencies, rutes lliteraries, etc.

Sala Infantil

Ta nel primer pisu, la sala infantil ye un espaciu afayadizu pa neños y neñes de menos de 14 años, con fondos que pretenden cubrir les necesidaes específiques d'información y ociu d'esti coleutivu. Amás de los servicios d'empréstamu, sólo pa socios y socies, y consulta, van desenvolvese otres actividaes al mesmu tiempu enfotaes en puxar pola llectura. 

Horariu

Sales de consulta y estudiu
Llunes a sábadu: 9:00 a 21:00 h
Domingos y festivos: 9:00 a 14:00 h

Sala de préstamu
Llunes a vienres: 9:00 a 21:00 h
Sábados: 11:00 a 14:00 h y de 16:00 a 21:00 h
Domingos y festivos: 11:00 a 14:00 h

Sala infantil
Llunes a vienres: 16:00 a 20:00 h
Sábados, domingos y festivos: 11:00 a 14:00 h

Díes nos que piesllen toles biblioteques del Conceyu
24, 25 y 31 d'avientu; 1 y 6 de xineru
Sábadu y martes d'Antroxu.
Selmana Santa: dende'l Xueves Santu hasta'l Llunes de Pascua.

Contautu

T: 985 510 439
Corréu Electrónicu: bibliotecabances@aviles.es

Señes

Plaza Domingo Álvarez Acebal, 2
33402 Avilés