El Bosque Comestible entama cinco actividaes tolos sábados del mes d'ochobre pa facer en plena natura y nel mesmu centru d'Avilés, pa tola familia. Entama'l sábadu que vien día 1 con un taller de yoga de 12:00 a 13:30 hores. Pa participar hai d'apuntase en bosquecomestible.aviles@gmail.com.
El sábadu 8 va haber un taller de semientes, el sábadu 15 va ser la hora de los esperimentos pa consiguir plastilina que pueda comese, el sábadu 22 van deprender a lleldar les verdures y el sábadu 29 habrá un taller de yoga familiar, col mesmu horariu y tamién hai d'apuntase primero.
La seronda ye un momentu estupendu pa dir a talleres de mediuambiente, xardinería, consumu con xacíu y comida sana. Inda pueden recoyese frutos y verduras que maurecieron pel branu; poro, ye un momentu perbonu pa que les families s'averen los sábados a esti espaciu qu'adulces se va dir tiñendo d'ocre.
Amás del nomáu corréu, apuntase al Bosque Comestible pue facese per teléfonu 632 804 216. Y como se va dir al prau, hai de llevar ropa cómodo y calzáu que nun cale. En casu de que tea malo, los talleres van llevase al Edificiu Fuero en Fernando Morán, 26.
El Bosque Comestible ta nuna finca municipal na cai José Cueto, tres de la Escuela Idiomes. Ye un espaciu verde y abiertu pa toles persones qu'echen de menos el contactu cola natura. Nació nel iviernu de 2011, cuando un grupu de persones voluntaries entamaron a facer una riestra talleres col enfotu n'iguar un espaciu verde nel centru d'Avilés pa enfotar a la comunidá avilesina no importante que ye y pa llantar árboles y plantes perennes nun públicu y puxando por una conciencia y responsabilidá coleutiva pa cola contorna urbana.
- Personas y Bienestar