Contacto

Dempués de diez años, el Conceyu d'Avilés va tar na Feria Internacional de Muestres d'Asturies FIDMA, que se va facer en Xixón del 3 al 18 d'agostu. La ciudá d'Avilés va tener un puestu que va compartir cola Autoridá Portuaria d'Avilés y que con una programación d'actividaes sirvirá de paltaforma pa falar de turismu, cultura, deportes, promoción empresarial y de la ufierta d'un veranu llaráu de tou tipu propuestes prestose pa pasalo bien que cada añu atrae a más visitantes. Ensin escaecer la programación especial con motivu de les fiestes de San Agustín y el centenariu de les rellaciones ente les ciudaes hermanes d'Avilés y ST. Augustine (Florida).

L'alcaldesa d'Avilés, Mariví Monteserín, el conceyal de Desarrollu Urbanu y Económicu, Manuel Campa y la conceyala de turismu, Raquel ruíz, tarán nel actu d'inauguración institucional de la Feria Muestres, el vienres 2 d'agostu. Dende ehí y durante dos selmanes de celebración de FIDMA 2024, habrá una riestra actividaes nel puestu  que se van dir asoleyando rellacionaes col turismu, les empreses, y habra tiempu tamién pa falar del PERTE del Agua que n'Avilés ta en plenu procesu de dixitalización, colo que va suponer una meyora na calidá del serviciu a beneficiu d'usuarios y usuaries. 

Conceyales del equipu de gobiernu incluyirán nes sos axendes la so presencia en FIDMA pa falar de les actuaciones y proyeutos que tienen en marcha dende los sos departamentos. A ello van sumase diferentes entrevistes de radio dende'l puestu de la Feria, onde l'alcaldesa y los y les conceyales falarán de la ciudá, del so presente y del so futuru.

Esta forma d'amosar la fuerza y atractivu de la ciudá y del puertu n'ensame encaxa cola estratexa de l'autoridá Portuaria d'Avilés d'enseñar, non sólo la so xunión estrecha cola historia de la villa y ciudá dende la Edá Media, sinón col sos presente y el so futuru, lo mesmo dende'l puntu de vista urbanu que como'l de los proyeutos y oxetivos comunes, en cuantu a desarrollu enonómicu, actividá industrial y creación d'empléu.

La conceyala de Turismu, Raquel Ruíz, afirmó que "la historia ta mui xunida al desarrollu del Puertu a lo llargo de tola nuestra historia y dende Promoción Turística, lo que pretendemos ye aprovechar l'entornu de la Ría, como tamos viendo colos paseos en barcu o col Centru d'Interpretación de los Cañones". Y respeuto a la promoción empresarial, dixo que la presencia na FIDMA sirvirá como centru d'espardimientu, fizo alcordanza d'actuaciones mui importantes que tán en marcha agora, como "la lliberación de los terrenos de les bateríes de cok, o l'alpliación del parque científicu teunolóxicu". La promoción de too ello dende esti puestu conxuntu col Puertu puede sirvir p'algamar inversiones.

Habrá un mapa virtual en 3D enteractivu que se va poder ver nel puestu, nel que se van ofrecer puntos d'interés con imáxenes y información de los sos diferentes cais y de les actividaes que se faen nellos, asina como'l proyeutu d'espardimientu del Puertu. Tamién s'incluyen nesti mapa dos equipamientos especiales de l'Autoridá Portuaria d'Avilés como son l'Espaciu Portus y la nueva Aula del Monumentui Natural de Zeluán y la Ensenada de Llodero