Contacto

El Conceyu d'Avilés meyora la xestión de la cita previa na Oficina d'Asistencia en materia de Rexistros (OAR) municipal con cuestiones nueves rellacionaes cola teunoloxía aplicaes a l'atención ciudadana, na llinia marcada poles lleis que tán en vigor anguaño. Presentó estes novedaes la conceyala de Facienda y alministraciçón Xeneral, Raquel Ruiz, acompañada pol xefe del Serviciu de Sistemes d'Información y Nueves Teunoloxíes del Conceyu d'Avilés, Alfonso Dou, y la direutora de los Servicios Xurídicos, Reyes Suárez. 

Asina, la Oficina d'Atención en materia de Rexistros (OAR) -enantes nomada Serviciu d'atención Ciudadana (SAC)- da-y a la ciudadanía la posibilidá de solicitar cita previa pa facer trámites de manera presencial nes sos instalaciones (na Casa Conceyu y n'El Foco de Villalegre). 
Hasta esi momentu, esta solicitú podía facese per teléfonu (985 122 100) o na web municipal. Esti últimu sistema afaya varies canales de comunicación, toes elles conectaes a una sola base de datos, lo que fai más cenciellu'l procesu pa pidir cita y pa tolos trámites que la ciudadanía necesite facer. En tolos caso, la persona que lo solicita, n'indicando'l trámite que va facer, recibirá un corréu electrónicu y/o un mensaxe SMS de confirmación, col llocalizador de la so cita y otros datos asociaos. El llocalizador va dexar que cambiar o cancelar la cita si fuere necesario. 

Les canales afayaes son estes

• Al traviés de  https://citapreviaoar.aviles.es (autoxestión on line): la persona interesada entra na web, escueye'l trámite que quier facer, el día y la hora pa la so cita ente les qu'haya llibres.
• Nel teléfonu 985 122 100 o presencialmente (xestión asistida): el ciudadanu o ciudadana solicita la so cita per teléfonu o presencialmente, y ye'l personal d'atención telefónica quien xestiona la cita solicitada.
• A través de l'app "Cita Previa OAR Avilés" (espera en movilidá): l'aplicación ye pa descargar y nun cuesta nada. Puede descargase  n'Apple Store (pa dispositivos con iOS) y en Google Play (pa dispositivos con Android). La persona que pida cita asina va recibir una alerta nel so móvil cuando-y llegue'l so turnu, asina nun va tener que tar  físicamente na OAR esperando.

L'aplicación móvil "Cita Previa OAR Avilés" puede descargase escaneando estos códigos QR:

•    Per aciu de Centralita Telefónica Automatizada nel teléfonu 984 852 881 (autoxestión telefónica): el ciudadanu o ciudadana podrá solicitar la cita siguiendo un procesu automatizáu mui fácil. Pa cambiala o cancelala, tendrá que dicir el númberu de teléfonu o'l llocalizador de la cita. 

o    Podrá escoyer el trámite pal que quier pidir la cita previa
o    Pídese'l teléfonu pa poder recibir dempués la confirmación de la cita
o    Va dase una cita primero, una intermedia y la última que tea llibre dientro'l calendariu  qu'hai abiertu.
o    Pa terminar mandaráse-y un llocalizador y la confirmación con tolos datos de la cita

Los principales oxetivos del nuevu sistema centralizáu multicanal son estos:
•    Organizar de manera más eficiente l'atención al públicu, evitando barullos y esperes.
•    Que la ciudadanía pueda rellacionase meyor cola Alministración, ofreciéndo-y munches canales de xestión de cites col Conceyu.
•    Meyorar l'atención y esperiencia con menos tiempos d'espera, faciéndola más dinámica.
•    Optimizar l'usu de recursos disponibles y meyorar la eficiencia con una previsión afayadiza de la carga de trabayu y los tipos d'atenciones, gracies a que los ciudadanos y les ciudadanes van indicar primero qué trámite ye'l que van facer.
•    Que se puedan incorporar servicios y trámites nuevos, con muncha más autonomía na xestión d'axendes nes unidaes.
•    Aportar información en tiempu real acerca del usu que se fai de los diferentes servicios, accediendo a la mesma a través d'un cuadru de mandu.

Con esti nuevu sistema preténdese tamién llevar a cabu una reaorganización del trabayu de les persones que tán na OAR, amás de dar una información más rápida a los y les xestores municipales pa dar unos servicios públicos meyores. 
Amás, les instalaciones de la OAR tán esperimentando una riestra meyores que van beneficiar a los sos usuarios y usuaries, como l'afatamientu d'una sala d'espera con una pantalla pa poder siguir l'orden de los llamamientos, y la instalación d'una máquina nueva interactiva pa sacar los tiquets. 

La implantación del nuevo sistema de solicitud de cita previa en la OAR, responden al cumplimiento, por parte del Ayuntamiento de Avilés, de la Ley 39/2015, de 1 de octubre, del Procedimiento Administrativo Común de las Administraciones Públicas.

La implantación del sistema nuevu de solicitú de cita previa na OAR, ye pa que'l Conceyu d'Avilés, cumpla cola Llei 39/2015, de 1 d'ochobre, del Procedimientu Alministrativu Común de les Alministraciones Públiques. 

La norma llanta, nel so artículu 13, que les persones tienen derechu a que-yos echen un gabitu pa usar los medios electrónicos nes sos rellaciones coles Alministraciones Públiques. Y nel so artículu 12, obliga a les Alministraciones a garantizar que les persones interesaes puedan rellacionase cola Alministración con medios electrónicos, afayando pa ello canales d'accesu necesaries, asina como sistemes y aplicaciones que se determinen en cada casu.