Contacto

El Conservatoriu Municipal Julián Orbón ofrez un taller d'aniciu musical pa neños y neñes de seis y siete años. Son cursos que se faen enantes d'entrar nes enseñances reglaes de música que ye dende los 8 años. Por eso, va ser un requisitu indispensable que l'alumnáu ñaciere en 2016 o 2017. 

Los horarios sedrán los llunes y martes a les 18:00 hores pa l'alumnáu de 6 años y los miércoles y xueves tamién a les 18:00 hores pal alumnáu de 7 años. Poro, van formase  cuatro grupos nos que'l taller sedrá d'una hora a la selmana.

El cursu pasáu participaron nestos talleres, que yeren sólo p'alumnáu que tuviere 7 años, un total de 18 neños y neñas de los y les que 15 yá pasaron a les enseñances reglaes como alumnáu del Conservatoriu pal cursu que vien.

Con una hora a la selmana de clases ente los meses d'ochobre a mayu, la matrícula cuesta 145 euros, pudiendo aplicase les bonificaciones llantaes na ordenanza municipal. 

Dende'l xueves 13 de xunetu hasta'l xueves 7 de setiembre tará abiertu'l plazu p'apuntase primero. Les solicitúes podrán presentase de manera telemática padres/madres, tutores llegales o les persones que tengan la guarda y custodia del o de la menor, al traviés de la Sede Electrónica (https://sedeelectronica.aviles.es/Convocatorias). L'orden p'apuntase determinará'l derechu d'almisión al taller.

Con estos talleres pueden “conocese tolos instrumentos musicales pa que l'alumnáu escueya un instrumentu nel futuru y tener una base enantes d'entamar les enseñancess reglaes, magar que facer estu taller nun da accesu direutu a estes enseñances, porque ye que ye la  Conseyería d'Educación la que regula'l procedimientu d'ingresu con una prueba d'aptitú y un sortéu dempués pa escoyer instrumentu”, esplica Carlos Galán, direutor del Conservatoriu Municipal

Con esta iniciativa, preténdese da-y contestación a la demanda de les families de poder acceder al Conservatoriu enantes de la edá mínima llantada pa estudiar les enseñances reglaes.

Los oxetivos que persigue esti taller d'aniciu musical son:

• Fomentar el gustu pola música.
• Reconocer les cualidaes del sonidu.
• Usar la voz como mediu d'espresión y de comunicación. 
• Desenvolver la coordinación motriz a través de la música y del movimientu. 
• Conocer los instrumentos musicales.
• Orientar preferencies pa escoyer nel futuru l'instrumentu. 

Los conteníos básicos sedrán éstos:

• Espresión corporal. 
• La espresión vocal. 
• Audición musical.
• Los instrumentos musicales.
• El ritmu.
• Les cualidaes del sonidu.
• Improvisación musical.

Calendariu informativu

- Tiempu p'apuntase: del 13 de xunetu al 7 de setiembre de 2023.

- Publicación del llistáu provisional de persones almitíes: 12 de setiembre de 2023.

- Tiempu d'alegaciones, mandando un corréu electrónicu a la direición conavile@educastur.org : 12 y 13 de setiembre de 2023.

- Publicación del llistáu definitivu de persones almitíes: 14 de setiembre de 2023.

- Tiempu p'apuntase: del 18 al 22 de setiembre de 2023.

- Publicación del llistaáu provisional de persones almitíes y asignación de grupu y horariu: 25 de setiembre de 2023.

- Plazu d'alegaciones y solicitúes de cambiu de grupu, con envíu de corréu electrónicu a la direición conavile@educastur.org : 25 y 26 de setiembre de 2023.

- Publicación del llistáu definitivu de persones almitíes y asignación de grupu y horariu: 28 de setiembre de 2023.

L'enllaz a la convocatoria y matriculación na sede electrónica ye ésti:

https://sedeelectronica.aviles.es/PublicacionTabs.aspx?tab=20&id=18358&t=OC&x=vInAdIsUIV4HrG+VBrmNaw