Contacto

La creación de la conceyalía de Normalización Llingüística d'Avilés, de la que pasa a depender la Estaya de la Llingua, hasta agora xunida a Cultura, trai tamién cambios nel portal web municipal, qu'estrena asina un espaciu propiu pa la nueva conceyalía, al que se puede entrar dende la direición www.aviles.es/normalizacion-llinguistica.

Dende esta nueva entrada éntrase a les once seiciones, nes que s'enseña l'actividá de promoción y normalización del usu del asturianu na ciudá de forma tresversal, en tolos ámbitos, del educativu al social. De la mesma manera que nel portal, preséntase n'edición billingüe, y yá ta activu del  too.

Los apartaos son Estaya de la llingua, Da-y a la Llingua, Neños y neñes de 0 a 3, Adolescencia y Mocedá, Igualdá, Na Escuela, Comerciu y Hostelería, Descubriendo Avilés, Díes especiales, Lletres Asturianes y Enllaces d'interés.

1. Estaya de la llingua. Equí esplícase qué servicios puede dar a la ciudadanía la Estaya de la Llingua y per ende la Conceyalía de Normalización, como son la traducción de documentos, campañes de normalización en varios ámbitos de la sociedá, actividaes con centros educativos, etc.

2. Da-y a la Llingua. Nesti apartáu ye onde se pueden atopar talleres y otru tipu d'actividaes nes que ye necesario apuntase pa poder participar.

3. Neños y Neñes de 0 a 3. Hai tres proyeutos entamaos pa esta etapa de la vida como son Xugamos pa deprender, El Mio Primer Vocabulariu y el Llibru pa lo Más Piquiñino.

• Xugamos pa deprender ye una riestra xuegos pensaos pa estes edaes tempranes, con un vocabulariu mui básicu rellacionáu colos animales domésticos, animales xabaces o'l cuerpu humanu.  Esti proyeutu foi mui nuevu, porque yera una estaya onde nun había nada y nel qu'Avilés foi pioneru, teniendo una continuidá nel tiempu. Procura sacase un material tolos años coincidiendo col Día de la Llingua Materna.
• El Mio Primer Vocabulariu, consiste nuna serie de carteles pensaos pa centros educativos con vocabulariu básicu d'animales, plantes, ropa, estaciones del añu, cuerpu humanu...qu'agora tán equí pa que se puedan descargar y usar.
• El Llibru pa lo Más Piquiñino, foi'l resultáu d'un trabayu de los diferentes Servicios de Normalización pa poder tener un llibru nel que madres y padres puedan pegar retratos, poner datos sobre'l neñu o la neña y qu'a loc abero seya un recuerdu pa tola vida. Piénsase en que'l repartu del llibru se pueda facer, como yá se fizo hai años contando cola collaboración del Hospital San Agustín, como regalu pa neños y neñes que puedan ñacer a lo llargo l'añu.

4. Adolescencia y mocedá. Recuperóse una campaña importante informativa pa saber cómo se podría poner el nome o los apellíos cola forma tradicional, El to Nome Diz Muncho de Ti. Esplíquense los pasos a dar y hai posibilidá de descargar el pdf cola información.

5. Igualdá. Con dos proyeutos importantes : Na Igualdá Nun Quedes Fuera Xuegu y Muyeres Escaecíes. Nel primeru plantégase un decálogu pa la non discriminación ente neños y neñes colos colores, los xuegos o los xuguetes. El segundu dedícase a recuperar muyeres escaecíes pa la historia.

6. Na escuela. Hai tres actividaes principalmente dedicaes a los centros educativos de Primaria. Estes actividaes son: Visites Teatralizaes pel Parque Ferrera, Talleres Pa que Nun t'Aburras y Folixa de Navidá.

• Visites teatralizaes, ye una actividá que ta dientro l'Axenda de la Conceyalía d'Educación pa que les escueles puedan dende qu'entamen el cursu apuntase a unes visites pel parque Ferrera nes que s'espliquen los árboles más emblemáticos de la nuestra cultura d'una forma lúdica y bien prestosa.
• Los talleres faense dende hai siete años nos Centros Culturales, con temática mui diferente, con materiales variaos y son pa neños y neñes de 4 a 8 años. Tamién van dientro'l catálogu d'actividaes de les escueles, anque'l mou de participación ye per aciu de les biblioteques de los Centros Culturales de La Carriona, La Xungarosa/El barrio de La Luz y Los Canapés.
• La Folixa de Navidá, lleva siete años de vida, con esti nel que tamos y intenta recuperar na escuela les tradiciones asturianes rellacioanes con esta época del añu, como son El Nataliegu o'l Ramu de Navidá.

7. Comerciu y hostelería. Aprovechando la Feria del Quesu y Vinu qu'entama tolos años el Conceyu d'Avilés, repártense unes bolses de cartón con un diseñu fechu especial pa esta feria con un lema, frase, refrán n'asturianu, pa les persones que merquen quesos na feria.

8. Descubriendo Avilés. Tien cuatro apartaos: Caleyavilés, Avilés nuna Guía, Guía Histórico-Artística d'Avilés y Avilés y los sos Parques I: el parque Ferrera. Esti apartáu ta dedicáu a toles actividaes plantegaes en rellación con visites de la ciudá guiaes o proyeutos que se publiquen, como resultáu de trabayos de diferentes persones o grupos, de la Universidá, de la escuela o d'otros ámbitos culturales.Les guíes que yá tán feches, sobre'l Cascu Históricu o'l parque Ferrera pueden consultase y descargase dende ehí mesmo.

9. Díes especiales, sición dedicada a esplicar dalgunos de los díes especiales del añu (Llingua Materna, Muyer, Lletres Asturianes y Mediu Ambiente) y con diferentes materiales, en dalgunos casos audiovisuales, preparaos pa que se puedan ver y emplegar como material escolar, d'investigación o simplemente por gustu de velos.

10. Lletres asturianes, con dos actividaes importantes que son Autores nel Camín, proyeutu que sirve p'averar a los y les autores, ganadores nes diferentes categoríes de los premiso concedíos pol Principáu d'Asturies, al públicu en xeneral o a centros educativos de Secundaria que xurde d'un conveniu firmáu ente'l Principáu y el Conceyu d'Avilés; y el Concursu de Micorrellatos L'Horru d'El Carbayedo, recuperáu pola Conceyalía de Normalización.

11. Enllaces d'Interés, son varios enllaces con instituciones, medios de comunicación, etc qu'usen l'asturianu como llingua principal nes sos comunicaciones o informaciones.