Contacto

El contratu pa dar el serviciu de cafetería del Complexu Deportivu Avilés ta en llicitación. Les empreses interesaes nello pueden presentar les ufiertes hasta'l 29 d'agostu nel Perfil del Contratante na na sede electrónica del Conceyu d'Avilés  (https://sedeelectronica.aviles.es/Publicaciones.aspx?t=L). Espérase que se vuelva a dar esti serviciu enantes de que termine l'añu. 

Les persones que tean pensando presentase a esta llicitación y que quieran ver la cafetería tienen que ponese en contautu col departamentu d'Alministración de la Fundación Deportiva Municipal, llamando al teléfonu 985 525 442, n'horariu de 9 a 14 hores..

La empresa a la que se-y dea'l contratu tendrá de facese cargu d'él 4 años. A lo llargo d'estos años, la Fundación Deportiva Municipal recibirá de la empresa un canon mínimu de 4.440 euros al añu (como mínimu 17.760 euros pa los cuatro años), tando incluyíu ehí, el consumu d'agua, lluz y calefacción. El valor estimáu del contratu, del que nun hai previstes nin prórrogues, nin cambios, ye d'un total de 417.343,73 euros, según l'estudiu de viabilidá económico-alministrativa que se fixere y que se publicó nel BOPA (nu 59, de 25 de marzu de 2022). 

Dempués de dos llicitaciones que nun llevaron a nada, esta tercera va facese como un contratu de concesión de servicios, nel que'l riesgu operacional trespásase al concesionariu o concesionaria. Esto pasa pol cambiu d'hai poco na doctrina de la Xunta Consultiva de Contratación Pública del Estáu en cuantu a la consideración del Réxime xurídicu del contratu de cafetería y restauración. 

Al empar d'ella, "tou contratu na prestación del serviciu de bar, restaurante o cafetería nes dependencies calificaes de dominiu públicu y qu'hai de pagar, per aciu de la esplotación del mesmu, nun tien de calificase como contratu alministrativu especial según la nueva LCSP, sinón como contratu de concesión de servicios nel casu de que concurra'l requisitu de la tresmisión del riesgu operacional", como pasa nesti casu. 

Por eso necesitóse una tramitación alministrativa diferente a les anteriores, teniendo qu'axuntar tamién un informe de viabilidá económico-financiera enantes. Esti informe sometióse a información pública un mes, dempués de publicalu nel BOPA'l 25 de marzu. 

La Fundación Deportiva Municipal entamó, yá n'agostu de 2021, la tramitación del espediente pa la llicitación del contratu d'usu y esplotación de la cafetería del Complexu Deportivu Avilés, quedando erma n'avientu del añu pasáu. Esi mesmu mes tratmitóse espediente pa llicitar el contratu nuevu, manteniendo'l mesmu formatu y procedimientu, quedando ermu tamién en febreru de 2022.

Un mes dempués, la Fundación Deportiva Municipal entamaba la tramitación d'un tercer espediente, nesti casu pa la concesión del serviciu, según la doctrina nueva de la Xunta Consultiva de Contratación Pública del Estáu señalada enantes.

Según lo espuesto queda claro que'l retrasu p'abrir  la cafetería del Complexu Deportivu Avilés nun ye por culpa  la Fundación Deportiva Municipal, al contrariu, como la Fundación sabe lo importante que ye'l serviciu que da la cafetería, lo mesmo pa les persones qu'usen les instalaciones como pal públicu en xeneral, punxo a funcionar los mecanismos de contratación alministrativa rápido pa poder axudicar esti serviciu lo primero que se pudiera.