Contacto

El mes d'agostu vien cargáu de propuestes musicales. Un añu más, llega a la Plaza de Camposagrado la Factoría Sound Summer del 21 al 25 d'agostu, a les 22.30 hores. Cinco bandes van faer baillar a los y les asistentes al ritmu de rock con tintes de jazz, blues o swing. Tolos conciertos son de baldre y al aire. El ciclu presentáronlu la conceyala de Cultura, Yolanda Alonso y Omar Fernández, programador del mesmu.

Lo meyor del rock, el blues y el jazz independiente fechu n'España va atopar otra vegada'l so espaciu nun certame entamáu pola conceyalía de Cultura y convertíu nun referente pa los aficionaos y les aficionaes más esixentes en tol norte'l país.

Factoría Sound Summer ta dientro la programación musical bayurosa d'agostu n'Avilés, con más de mediu centenar de conciertos, ente los grupos que participen nos distintos festivales, les actuaciones en solitariu y les grandes orquestes, y toos ellos son de baldre.

Van ser cinco recitales qu'entamen el domingu 21 col cuartetu de rock, Nonno. El rock clásicu y alternativu de los 90, con lletres bien ellaboraes y fondes, fundíes nun equilibriu perfeutu. Con cuatro álbumes publicaos, el so últimu discu, "Rebelión", ta trescaláu d'una visión crítica. Asina, na lletra de "Tierra quemada" denuncien la falta d'empatía política y humana cola inmigración obligada. En cantares como "Derríbalos" o "Imperios de polvo" dexen claro'l so compromisu col cambiu.

Susan Santos va ser la siguiente en pisar l'escenariu de Camposagrado. La cantante y guitarrista pacense amestó rock, blues y otres músiques de raigaños americanos col so estilu particular. Años de xira en festivales y sales d'Europa, Estaos Xuníos y México lleváronlu a ganar en 2018 el Best Musician Perfomance nos European Blues Awards. Amás, al añu siguiente nomináronla a los Texas Sounds Music Awards en Jefferson.

La representación asturiana vien de la mano de la conocida banda mierense Trash-Tornaos. Con 20 años nel mundu la música, el grupu del que ye cabezaleru Boby Gonzales, xuntó d'una forma mui atrevida'l blues, jazz, swing y rock and roll. El so espectáculu más nuevu, "acartOOnados", entemez les sos dos pasiones: la música de los años 30, 40 y 50 coles películes d'animación de la primer metá del sieglu XX.

Con influencies del rock y el hard rock de finales de los 70, la banda catalana Saturna llogra combinar riffs pesaos con composiciones más sensibles y sutiles. La so música llevólos a percorrer España, Europa y Estaos Xuníos. Anguaño atópense presentando'l so cuartu álbum, "Atlantis", y el so postreru split "Higher Selves".

Pa pesllar a lo grande llega la banda bilbaína Los Brazos que van esplegar tol potencial del rock sureñu de los Estaos Xuníos. Garren el nome del Ríu de los Brazos de Dios en Texas nel que a la so vera entemécense delles cultures llaraes de música. En "Universal", el so últimu discu, pasen pel hard rock, rockabilly, country o'l folk.

Calendariu

• Domingu 21 d'agostu. Nonno
• Llunes 22 d'agostu. Susan Santos
• Martes 23 d'agostu. Trash-Tornados
• Miércoles 24 d'agostu. Saturna
• Xueves 25 d'agostu. Los Brazos